Ларгсса хамискьини Расул ХIамзатовлул цIанийсса библиотекалуву хьунни жяматийсса ишккакку, Аьрасатнал Федерациялул культуралул лайкь хьусса зузала, Аьрасатнал дакьаврил фондрал мусил медалист, «Дараччи» ихIсандалул фондрал гьану бивзсса, миллатрал язисса душ, Мариян Илиясовал аьпалул мажлис.
Бусса оьрму ихIсандалул даврин хас бувсса, миллатрал ирсирай нанисса аьдатру,эбадатру, культура ва маз буруччаврил, ябаврил цIанийсса давуртту дачин дурну бивкIсса Мариян ЧIибиевнал аьпалул мажлисрайн бувкIун бия, чIявусса инсантал.
Ва кьинисса аьпалул мажлисрал тасттикь буллай бия жуятува личIи хьуну махъгу Марияннул бусравшиву миллатрал дянив тачIав хIура къахьунтIишиву.
Аьпалул мажлис тIивтIуна Миллатрал библиотекалул директорнал хъиривмур Сарат Жабраиловал. Мажлис бачин бувну бия «Дагестан» ГТРК-лул лакрал вещаниелул редактор Тамара Закарьяева. Цила ихтилатраву ванил кIицI лавгуна, Марияннул щала оьрму ххирасса миллатрайн лажин кIялану бувтшиву. Миллатрал дянив ва хIала бакъасса, ванил кабакьу къабувсса царагу мероприятие къашайсса диркIшиву. Марияннул каялувшиндарай «Дараччи» клубрал дурсса бусравсса давурттал хIат-хIисав дакъашиву. Ванил мукунма кIицI лавгуна, «Дараччи» клуб хIасул бувния шийнмай, Марияннул дайдирхьусса гьарицагу давурттал чIарав ацIайсса ивкIшиву, ва цуппа куна сахаватлувсса (аьпа баннав цал) ванил лас Сиражуттин Илиясов ва вайннал щалва кулпат.
Хъирив ихтилат бувна Мариян Илиясовал цIанийсса «Дараччи» фондрал каялувчи Гульшан Хасаевал.
– ХIакьину жува цачIун бунну Мариян ЧIибиевнал. ХьхьичIва-хьхьичI барчаллагь учин ччай бура Марияннул буттал шярава бувкIсса школалул директор Малик Къушиев бакIчисса хъамаллурахь. ГьунчIукьатIрал жяматращал цалчин хьунабакьайхтува бувчIуна вай уздансса инсантал бушиву. Укунсса жяматрал дянив лявхъусса Мариянгу ляличIисса инсан бия. Ванил дакIнил гъилишиву ва чани бияйва цинявннайн. Цирив ца тIилисин бия Марияннуву, цичIанма, цила хIикматшивручIан инсантал кIункIу буллалисса. Ва бия буттал шяраваллил жяматрангу ххирасса, Читтурдал жяматрал дянивгу хIурмат-кьиматрайсса инсан. КIицI лаганна, хьхьичIва-хьхьичI Дагъусттаннай ихIсандалул давуртту дачин дурсса хъаннил жяматийсса суккушиннарал фонд Марияннул сипталийн бувну тIивтIуну бивкIшиву. «Дараччи» клубрал дайдихьулий Марияннул урчIа кану бивкIссар уздансса, ххаллилсса лаккудушру: Гулизар Султанова, Халла Оьмариева, Светлана Шабановна, Рая Загълиева, Сияли ХIажиева, Кубра Султанова, Шуаьнат Илиясова, Качар ХIусайнаева ва цаймигу. Кьинилия кьинилийн чIяву хъанай бавчуссар клубрал лагма лавгми. Клубрал итабавкьуссар мюрщисса оьрчIансса луттирду, учительтурансса лакку мазрайсса пособияртту ва цамургу литература. Мариян ЧIибиевнал сипталийну ва «Дараччи» клубрал ка-кумаграйну дацIан дурссар бусалдаравун багьсса ПартIу-ПатIимал гьайкал.
Бия яхI бусса хъамитайпа. ХIакьину барчаллагь учин ччай бура Марияннул оьрчIахь, ванил дачин дурну диркIсса бигьа дакъасса даврицIун кабакьу буллалаврихлу, – увкуна Гульшан Хасаевал.
Мариян дакIнийн бутлатисса ихтилатру бувна ялагу Дагъусттаннал халкьуннал чичу Мирза Давыдовлул, ГьунчIукьатIрал жяматрал суккушиндарал бакIчи ХIажибутта ХIусайновлул, Дагъусттаннал ва УзбакIнал лайкь хьусса художник, скульптор МахIаммадаьли Аьлиевлул, балетмейстер, хореограф Тарият Къапиевал, Дагъусттаннал Технический университетрал ингилис мазрал кафедрал хъунмур Жанна Абуевал.
– Мариян тIисса цIа ттун яла ххирамурди, ва дур Ися идавсил (с.аь.с.) ниттилгу цIа, ттула аьзизсса буттал ниттилгу цIа. Мариян ттун цалчин ккавкссар университетраву дуклакисса шиннардий. Ва танийва бия бакIралгу, чурххалгу ххуйсса, итталун багьайсса душ. Мариян бия чумартсса, уздансса хасият дусса, политиктурал даражалийсса хъунисса масъалартту щаллу бавривух хIала буххаврия махъаллил къашайсса инсан. Ванища бювхъуна клубрал даврил лагма лаган бан итххявххусса, хьхьичIунсса хъами. Ванин кIула миллатраву хьхьичIва-хьхьичI ябан аьркиншиву рувхIанийсса идарартту. Цила аякьалийн ласлай бикIайва миллатрал кказитрал, театрданул, радиолул масъалартту. Жул редакциялийн ссайгъатирттащал Мариянгу, мунищал архIалмигу бувкIсса чIумал, идаралийсса миллатирттал редакцияртту жуй мяш хъанан бикIайва. Мариян ЧIибиевнал, буниялагу, хъунмасса бутIа бивхьуссар миллатрал кказитрал, радиолул, театрданул даврил чIарав бацIавриву, – увкуна Качар ХIусайнаевал. Шалласу Рамазановлул кIицI лавгуна Мариян Аьрасатнал даражалийсса лагрулул инсан бивкIшиву. Марияннул гьану бивзсса хъаннил ккурандалул х1акьинусса кьинигу цилла хъачIунттай хъуннасса хъар ларсун най бушиву.
Лакрал театрданул директор Бадрижат МахIаммадх1ажиевал бувсуна, «ПартIу ПатIима» спектакль бишин сиптачигу хьуну, костюмирттая, нукIузаманнул кьай-кьуйлия тIайла хьуну, цимур-ца дузал дансса харжлугъ Марияннул цила бакIрайн ларсун диркIшиву. Му спектакльданун лайкьсса кьимат бишлай, Мариян Илиясован ва театрданул коллективран дуллуссар ДР-лул ПаччахIлугърал премия. Дагъусттаннал халкьуннал чичу Хизри Илиясовлул бувсуна Марияннул каялувшиндаралу, республикалул агьамшиву дусса жяматийсса идарарттал давуртту дакъассагу, дачин дурну бивкIшиву Аьрасатнал ва дунияллул халкьуннал лагрулийсса давурттугу.
Малик Къушиевлул кIицI лавгуна, Мариян дазу дакъа буттал шяравалу ва шяраваллил агьлу ххирасса инсан бивкIшиву.
– Мариян ЧIибиевнал буттал шяравунсса аьрххи байбишайссия школалия. Ванил оьрму хас бунни чIявуссаннал ургъил къабайсса жяматийсса давурттан. Ванища бюхъайва цила бакIрайн ларсъсса даву кIанийн руртун дузрайн дуккан дан. ХIакьину ГьунчIукьатIрал шяраву буссар Марияннул гьану бивзсса, ххаллилсса давуртту дачин дурсса «Дараччи» фондрал филиал, – увкунни Малик Къушиевлул.
Мажлисрайн бувкIцири, ца зумату кунма, кIицI лаглай бия, Мариян ххишалану инсаншиврул бутIа буллусса, цила дакI кунна, каругу тIиртIусса, аькьилсса хасиятрал заллу бивкIшиву.
Ихтилатирттал лях-карах Мариян ЧIибиевнахасса бувсса балайрду увкуна ДР-лул лайкь хьусса артистътал Загьидат Муслимовал ва Жанна Кьурбановал. Марияннухасса шеърирду бувккуна Дагъусттаннал халкьуннал артистътал Аслан МахIаммадовлул ва Саният Рамазановал.
Ахирданий цала ниттил аьпа абад бан бувкIминнахь барчаллагь увкуна Марияннул душнил Динара Маммаевал.
Имара Саидова
