Вай гьантрай лакрал аьлимтурал ккурандалувун ца уттигу жагьилсса аьлимчу ххишала хьунни. Лакрал райондалийсса Буршиял шяравасса ЦIаххаева РайхIанат Оьмариевнал гьашину аспирантура къуртал бувну, Н.Э. Бауманнул цIанийсса Къазаннал паччахIлугърал Ветеринариялул медициналул академиялуву дурурччунни хIайвантрал иммунологиялул ва инфекциярттал азардан хас дурсса диссертация. РайхIанатлул элмийсса давриву ххал диргьуну дур Дагъусттаннайсса аьнакIал сальмонеллезрал тагьар къулай дансса шартIру.

Ванил элмийсса даврил каялувчи ур ветеринар элмурдал доктор, ДР-лул элмурдал лайкь хьусса ишккакку, КIундиннал шяравасса ХIабибуллагьлул арс Жабраил Мусиев.
РайхIанатлул лайкьсса даражалий диссертациягу дурурччуну, лавхъунни «Ветеринар элмурдал кандидат» тIисса элмулул лавайсса шачIанттуйн.

Ванил хьхьичIунсса хIасиллай М.М. Жамбулатовлул цIанийсса Дагъусттаннал паччахIлугърал Шяраваллил хозяйствалул университетгу къуртал бувну, бувххуну бур аспирантуралувун. Дуклай бунува, зий бивкIун бур Ветеринарный институтрал лабораториялуву. Шикку ветеринар-хIакинну зий хьуну дур ванил 20-хъайсса шинну.
РайхIанат хъунма хьуну бур Буршиял шяраву хIурмат-кьиматрайсса Оьмари ва Гулаят ЦIаххаевхъал кулпатраву. Ппу ччяни дунияллия лавгун, ниттин, Гулаятлун багьну бур 3 оьрчI ччаннай бацIан буллан. Гулаятлул циллагу 30-хъайсса шинну хьуну дур Дагъусттаннал Шяраваллил хозяйствалул академиялуву зий.

ЦIана РайхIанат зий бур М. М. Жамбулатовлул цIанийсса Дагъусттаннал хозяйствалул университетрал микробиологиялул кафедралий преподавательну. Ва мукунма бур Республикалул ветенинар лабораториялул Испытательный центрданул каялувчинугу.

РайхIанат дакIнийхтуну барчаллагьрай бур оьрмулул ва даврил ххуллий мукъуйну бикIу, иширайну бикIу чIарав бавцIусса, кумаг бувсса инсантурайн.
РайхIанат Оьмариевна, барча буллай буру чIярусса шиннардий буллай бивкIсса захIмат дузрайн буккаву ва элмулул ххуллийсса шачIану лахъаву, чIа тIий буру гихунмайгу хъунисса тIайлабацIуртту!

Имара Саидова