Уттигъанну Бущихъав (Ботлих) тIиртIунни лаккудушнил, Гьуйннал шяравасса жагьилсса художница ПатIимат Кьурбановал циллалусса «Слово» тIисса цIанилусса выставка.

Ва сакин дурну дия Бущихъиял историко-краеведческий музейрал директор Аминат ДибирхIажиевал. Выставка тIитIлатIисса шадлугърай гьуртту хьуна Бущихъиял райондалул бакIчи Р. ХIамзатов, ванал хъиривчув А. Лабазанов ва цаймигу бусравсса хъамал.

Лаккудушнил выставка хасну Бущихъав циваннивав хьусса тIисса суалгу хIасул хьун бюхъай. ПатIиматлул дирхьусса суратру соцсетирдай ккарксса Аминат ДибирхIажиеван ччан бивкIун бур гьунар бусса художницал выставка цачIара тIитIин.
– Ва ларгсса гъинттул зунттаву микку-тикку дирхьуссагу, муниннинссагу диялсса суратру дуссия. Ва выставкалийннин суратирттал серия печатьрал графикалийну щаллугу дурну, на бавчура ттинин нава цалвагу къабивсса Бущихъав. Шикку нагу, ттущалмигу хъинну ххуйну кьамул бувунну. Шикку жу цIу-цIусса хъин-хъинсса инсантуращал кIул хьуру, – буслай бур ПатIимат.

ПатIимат бувну ва хъунма хьуну бур МахIачкъалалив. Школалийсса агьаммур дуккаврищал МахIачкъала шагьрулул ОьрчIал художественный школагу къуртал бувну, бувххун бур М. Жамаллул цIанийсса Дагъусттаннал Художественное училищалувун. Ванияр ца-кIира шинал хьхьичI ПатIиматлул Москавлив РГГУ-рал Практикарттал ва музейный технологиярттал лаваймур школалий дурну дур «Арт-практика: основы реставрации и переплета книг». ЦIанасса чIумал ПатIимат бур ДГПУ-рал художественно-графический факультетрал 2-мур курсрал студентка. Шикку ванил ласласи­ссар кIира профильданущалсса педагогнал кIулшивуртту: «Изобразительное искусство» ва «Дополнительное образование».
ПатIимат ттинин гьуртту хьусса выставкардал ва проектирдал сияхI къакутIасса дур: «ДУДЛИНГ ЗЕНТАГЛ» (2016 ш.), «Камень, ножницы, бумага» (2019 ш.), «Все о Фазу», Дунияллул халкьуннал дянивсса биеннале «Кубачинская башня» (2022 ш.), «Лето – 2022» Республикалул жагьилсса художниктурал выставка, «Художник – педагог», «Абстрагамз», «Орнамент» (2023 ш.)

ЦIана Бущихъиял тарихрал ва улча лахьхьаврил музейраву хьусса «Слово» выставка хъанахъиссар ПатIимат Кьурбановал циллалусса цалчинсса выставка.
– Ттуллалусса цалчинсса выставкалий ттун бувчIунни ттулла творчестволул сияхI-ккал дахьра дайдирхьушиву. Ттинин хьусса коллективрал выставкардай укунсса асарду бакъая. Ва выставкалул ттувувасса чIявусса суаллахьхьун жавабру дуллунни, ва хьунни ттувурасса хьхьарами ва гужми хасиятру ялун личин даврил хъинсса опытну.
Выставкалул цIанил ялувгу бусанна. На хъунма хьуну бура МахIачкъалалив дачардал пейзажирттал дянив лавсун, шагьрулул аьлагъужалия, аваралия архну. Ттул оьрчIшиву ларгунни ниттил ниттищал ва ниттил буттащал, вайннан ахъуву, багъраву кумаг буллай.

Махъунмай га чIумувун буруглай, ттун чIалай бур яргсса муттарду, масалдаран, чIивисса нава ттаттащал цIансса ва мунищала кIукIлусса аьрщараву чимус бугьлай. Га чIумал ттун пикривагу ча хьунссия хасну шикка байбихьлахьишиврия ттулва тарих, ттунна шикку, тIабиаьтраву, лякъинтIишиврия гьарцагу сиппат, образ. Художник хIисаврайсса ттулла цалчинсса ккаккиярттаву на буржлувну буссара ттула ниттин – нава художественный школалийн бувцуну дуркIсса. Ттун хъунмасса тIайлабацIу хьуна Хаджаева Нина Васильевнал мастерскойлувун багьансса. Шикка лавгун 4 шинавун, дуккавугу къуртал дурну, на махъунмай зана хьура цIусса рольдануву – тти ттун багьлай бия нава дарс дихьлахьисса оьрчIан хъару сивсуну тIитIин дан кумаг буван, творчестволул дунияллийх вай нигь дакъа лехланшиврул.

Шаэр Иосиф Бродскийл увкуну бур маз шаэрнал ярагъ (инструмент) ба­къар, ялунгу шаэр – мазрал ярагъри тIисса махъру. Ттуннив ччива шикку ххи буван: Художник – тIабиаьтрал ярагъри, инструментри, тIабиаьтрал цилва личIи бувайссар жулва гьавасрал бущи куну. ТIабиаьтрал ссихI ласласавугу, нава ссихI ласласавугу цар, – тIий бур ПатIимат.

Выставкалул цIанил ялувсса суалданухьхьунгу тIий бур:
– Дагъусттан хъанахъиссар кувнниха кув къалархьхьусса затирттал, чIяву чIурдал билаят. Дагъусттан ттущал мудангу гъалгъа тIий буссар щатIал, мурчал, гъаралуннил чIурдайну… Укун лявхъуссар ттул МАХЪ…

Бадрижамал Аьлиева