Ттигъанну Дарбант шагьрулий «Патриот» тIисса паркраву най бивкIсса «Каспий- 2026» тIисса Ухссавнил Ккавкказуллал жагьилтурал кIулшивуртту дулаврил форумрай хьунни шадлугърал даражалийсса личIи-личIисса мероприятияртту.

Форумрал лагрулий Дагъусттаннал бакIчинал бигарду бартбигьлагьисса Федор Щукиннул Хъун дяъвилий къучагъшиву ккаккан дурсса Башир Закаевлул лайкь дурну диркIсса «За отвагу» тIисса награда дулунни ванал наслулиясса Ибрагьим Ибрагьимовлухьхьун. Награда дуллалисса мажлисрай гьуртту хьунни ДР-лул лайкь хьусса строитель, хIакьсса патриот Зиябуттин ХIажимирзаев.

Лакрал райондалийсса ГьунчIу­­кьатIрал шяравасса Закаев Башир оьрмулул 21 шинаву лавгун ур Ватан душманная дуруччин. Аьралий бигарду бартбигьлай ивкIун ур бусалдаравун багьсса Кутузовлул ордендалул 539-мур авиациялул штурмрал полкраву битуну. Дяъвилул шиннардийсса оьсса талатавурттаву, 19-ла гьаллавун левххун, кьатI дурну дур душманнал цикссагу самолетру.
Ванал махъра-махъсса гьаваллавусса талатаву хьуну дур 1945 шинал мартрай. ЧIярусса шиннардий Баширдул бакIрачIан бувкIмур кIул бан къахъанай бивкIун бур. 80 шин ларгун махъ, Калиннинградуллал областьрайсса хъиривбизултрал кьюкьлул бувсса хъунмасса захIматрайн бувну, тай шиннардий хьусса ишру сантрайн бичин, самолет дагьсса, нигь-ццах бакъасса къучагъсса штурмовикнал аьш-бакI дусса кIантту аьлтту бан бювхъуну бур. Та ппурттуву Башир Закаевлущал Ил-2 самолетрал кабиналуву цаймигу кIия летчик ивкIун ур. Самолет дагьсса кIанттурдай ляркъуну дур къучагънал медаль ва «Серенада Солнечной долины» тIисса балайлувасса ххару бусса чагъар. Вай хьуну дур Баширдул аьш-бакI кIул дансса тасттикьшиннану.
Къучагънал медаль тапшур дуллалисса лахIзалул исват бунни чIун цуксса гьарчангу, аьраличунал гьунар абадлий дакIний личIантIишиву.