Июньдалул 11-нний Кку­ллал райондалий Ваччиял шяраву лахъа-хъунсса даражалий хьунабавкьунни Якутиянавасса фольклорданул коллектив. Райондалий ва кьини дия Аьрасатнал Халкьуннал цашиврул шинан хас дурсса «Горцы» тIисса Дунияллул халкьуннал дянивсса фольклорданул ва аслийсса культуралул XXIV фестиваль.

Гьашину фестивальданул лагрулий райондалийн бувкIун бия Саха Республикалиясса Хатассы шяравасса «Кэрэ Куо» тIисса вокалданул ансамбль.

Аьдатравун багьсса куццуй хъамал хьунабавкьуна Ккуллал райондалул бакIчи Ажуб ХIусмановлул ва райондалул художествалул самодеятельностьрал коллективирттал. Райондалул культуралул къатлуву тIивтIуну бия лакрал миллатрал ирсирай нанисса культуралул ва багьу-бизулул майданну ва лакку дукрардал ссупрарду.
Фестивальданул сий гьаз дуллай, хъамал ва цинявппагу гьуртту хъанахъими махIаттал-хIайран буллай, цала зумуну магьирну хьхьуттайх лахълай ия ЦIувкIуллал шяравасса, гьунар лавайсса цIанихсса пагьламан Камил Мамаев. ХIасил, шадлугъирттал чулуха авадансса ва гьурттучитуран дакIний личIансса байран дия Ккуллал райондалий. Хъамаллуращал суратру рирщуну, пагьламаннай тамаша бувну, къавтIавуртту дурну махъ байбивхьуна Культуралул къатраву­сса мажлис.
Фестивальгу тIиртIуну, гьур­ттучитал барча буллалисса махъ лавхъуна Ажуб ХIусмановлул. Гихуннай фестиваль дачин дурну ия Хъусращиял Магьирлугърал къатлул режиссер Марсел Сулайманов.

Авадансса концертрал программа ккаккан дурна Саха Республикалул культуралул лайкь хьусса зузала, «Кэрэ Куо» ансамбльданул хъунмур Татьяна Окороковал каялувшиндаралусса коллективрал.

– Жу цалчинну гьуртту хъанахъисса «Горцы» фестивальданий, цалчинну бувкIсса Дагъус­ттаннайнгу. Ххарину буру караматсса тIабиаьтгу дусса, хъамаллурал хIурмат-кьиматгу бусса аьрщарайн бучIан нясив шаврия. Жу лавсун бувкIру жула халкьуннал культура, аьдат-эбадатру, ккаккан дуварду ххаллилсса концерт. Барчаллагьрай буру лавайсса даражалий фестиваль хIасул дурсса райондалул каялувчитурайн, культуралул къатлул зузалтрайн, – увкунни Татьяна Окороковал.

— Жул райондалий гьарица шинал лавайсса даражалий тIайла дуккайссар аьдатравун дагьсса «Горцы» тIисса фольклорданул ва аслийсса культуралул фестиваль. Ванийнсса хIадуршинна дуллай, жу зий байбивхьуссару зурул хьхьичIва. ХIарачат буллай бивкIру ва даву хъамалгу рязину, лажин кIялану дуван. Фестивальданул гьурттучитуран ляличIину ххирар караматсса тIабиаьт дусса райондалийн букIлан. Муния жугу хъинну рязину бикIару. ХьхьичIми шиннардий буссия Къиримнавасса, Арманинавасса халкьуннал творчествалул коллективру. Гьашину жучIан бувкIунни Якутиянавасса хъамалгу. Жула аьдатирттащал, багьу-бизулущал, миллатрал дукрарардащал, касмурдащал, лаххи-ликкиялущал, магьирлугъращал жу вай кIул барду.

ХIасил, архсса зунттаву ялапар хъанахъисса лакрал миллат щиярчIавгу лагьну бакъашиву, ялунгума лавайну бушиву тасттикь барду. Ххариссару мудангу жучIанма бувкIсса хъамаллуврал хIурмат буван ва ми лайкьсса даражалий кьамул буван. Жула миллатрал творчествалущал хъамал кIул бувну махъ, МахIачкъалалив хьунтIиссар фестивальданул цинявппа гьур­ттучитал цIачIун хьусса гала-концерт. Миккугу жу муданна кунна, лавайсса даражалий ккаккан дантIиссар аслийсса лакрал ми­ллатрал культура.
Барчаллагьрай буру республикалул Культуралул министерствалул ва Халкьуннал творчествалул къатрал каялувчитурайн фестивальданий гьуртту хьунсса ихтияр жухьхьунна дулаврихлу, – увкунни Ккуллал райондалул магьирлугърал ва досуграл къатлул хъунмур Марина Ибрагьимовал.

Вара фестивальданул лагрулий хъамаллувран бунни Камалуттин Кубачановлул цIанийсса Тарихрал ва краеведениялул музейравунсса экскурсиягу. Музейрал директор Тагьир Абакаровлул хъамаллуврахь бувсунни райондалул тарихрая, жяматрал багьу-бизулия ва цIанасса оьрмулия.

Имара Саидова