Ноябрь зурул 8-нний щалагу Аьрасатнаву дакIнин бичайссар къуллугърал бурж бартбигьлай жанну дуллусса виваллил иширттал органнал зузалт.

Цуксса хIайпнугу, тахсиркаршивурттащалсса талатаву низамрал къаралданий бавцIуминнан ххирану дацIай. Ва кьини Виваллил иширттал министерстварттал сипталий ва сакиншиндарай билаятрал регионнай шайссар къучагътал дакIнин бичлачисса аьпалул мажлисру, жанну дуллуминнал гьайкаллацI тIутIивгу дирхьуну, баян байссар минутрайсса пахъ багьаву. Къуллугърал бурж бартбигьлай жанну дуллусса, ва ххуллий ккаккан дурсса чувшиврухлу личIи-личIисса наградарттан лайкь хьусса зузалтрал цIарду абадлий чирчуну дуссар Аьра­сатнал Виваллил иширттал органнал зузалтрал сияхIрай. ЦIанасса чIумал реестрданий 2547 зузалал цIа дур. Гьашину ва сияхIрай 12 цIа ттигу ххи хьунтIий дур. ХIакьинусса кьини Аьрасатнал регионнай жанну дуллуминнал цIарду абад дурсса кIиазарунния лирчусса гьайкаллу дацIан дурну дур, 17 азарунния ливчусса зузалтрал кулпатру Виваллил иширттал министерстварттал аякьалийн лавсун бур.

Дагъусттаннай къуллугърал бурж бартбигьлай жанну дуллуми дакIнин бичлачисса аьдатравун дагьсса митинграй гьуртту хьунни ХIукуматрал председатель МахIаммад Рамазанов, Дагъусттанал бакIчинал ва ХIукуматрал администрациялул каялувчинан кIанайсса МахIаммад Дибиров, Дагъусттаннал виваллил иширттал министр Аьбдурашид МахIаммадов, цалчинма вице-премьернан кIанайсса Рамазан ЖахIпаров, УФСБ-лул, Силистталул комитетрал Силистталул управлениялул, МЧС-рал ва цаймигу гужирдал ведомстварттал каялувчитал. Виваллил иширттал министерствалул хьхьичI дацIан дурсса гьайкалдануцI гьурттучитурал дирхьунни тIутIив, баян бунни минутрайсса пахъ багьаву. Лавхъсса хъамул чирахъру бивхьуну, чивчунни «Скорбим» тIисса махъ.
– Гьайкалданий абад дурсса гьарица цIанилу жунма чIалай бур инсаннал оьрму, ганал кулпат ва хъуннасса ххажалат. Жунма вай мудан дакIний бикIан аьркинссар, вайннал кулпатирттал, гъан-маччаминнал чIарав бацIан аьркинссару. Хъирив нанисса никирттахь вайннал чувшиврия буслан аьркинссару, - увкунни цала ихтилатраву Рамазан ЖахIпаровлул. Виваллил иширттал министерствалул зузалтрал хIадур дурну дия аьпалухьхьун лавгсса даврил уртакьтуран хас дурсса асар хьунсса музыкалул ва театрданул программа.