МахIачкъалалив хьунни къуллугърал бурж бартбигьлай жанну дуллусса виваллил иширттал органнал зузалт дакIнин бичлачисса мероприятие.
Шикку гьуртту хьунни Дагъусттаннал ХIукуматрал председатель Аьбдулмуслим Аьбдулмуслимов, Дагъусттаннал виваллил иширттал министр Аьбдурашид МахIаммадов, Дагъусттаннал прокурор Виктор Эпп, МахIачкъала шагьрулул бакIчи Юсуп Умавов, ихтиярду дуруччай органнал, Халкьуннал Мажлисрал вакилтал, аьралий иширттал ветерантал.
Аьпалухьхьун лавгминнал оьрчIру ва мачча-гъан бавцIуну бия миннал суратругу дургьуну. Дагъусттаннал виваллил иширттал министерствалул къатрал хьхьичI хьунни аьдатравун дагьсса аьпалул акция. Лавхъсса чирахъирттайну акциялул гьурттучитурал чивчунни «Помним» тIисса махъ. Жанну кьурван дурсса зузалтрал гьакалдануцI тIутIив дирхьуну махъ, миннал аьпалун баян бунни минутрайсса пахъ багьаву. Яла итабавкьунни гьаваллавун кьурукьру хьусса кIяласса шарду.
2008-ку шинал Дагъусттаннал Виваллил иширттал министерстволул къатрал хьхьичI дацIан дурсса гьайкалданий абад дурну дур къуллугърал бурж биттур буллай жанну дуллусса виваллил иширттал органнал зузалтрал цIарду. Мармарчарил улттай чирчусса цIардал цал ттигу дакIнин дутлай дур жанну дуллуминнал чувшиву.
