Тталаткьини «Дагестан» РИА-лий хьунни Дагъусттаннал аьралий комиссар, полковник АьбдурахIман Мурадхановлул интнил призыврал хIакъиравусса брифинг. Шикку гьуртту хьунни аьралий комиссариатрал отделданул хъунама ХIусайн ОьмархIажиевгу.
Военкомнал бувсунни аьралий къуллугърал хIакъиравусса закондалуву хьусса дахханашивурттайн бувну, аьралуннаву къуллугъ бан буцаврицIун дархIусса циняв мероприятияртту январь зурул 1-нния шихуннай дайдирхьушиву. Амма призывниктал хьхьичIва кунма шинай кIийла тIайла буклантIишиву аьралуннавун. Интту – апрель зурул 1-нния июльданул 15-ннийн бияннин, ссуттил – октябрьданул 1-нния декабрьданул 31-ннийн бияннин. Призыврай бувцуми хьхьичIва кунма къуллугъ буллантIиссар ца шинайсса. Ми хасъсса аьралий операция нанисса кIанттурдайн тIайла къабуккантIиссар. Ларгсса шинал призыврал хIасиллу дуллай, военкомнал бувсунни, октябрь-декабрь зурдардий аьралуннаву къуллугъ бан буцлай бивкIшиву 1995-2007-ку шиннардий бувсса оьрчIру. Республикалун ккаккан дурсса задание щаллу дуршиву. Ванал кIицI дунни призыврал сакиншиннарал чулуха ххуйсса ккаккияртту чIалачIи дурсса районну. Миннувух Лакрал ва Ккуллал районнугу дур. Гьашину апрель-июль зурдардий аьралуннаву къуллугъ буллан буцлантIиссар 1996-2008-ку шиннардий бувсса оьрчIру. Ми гьан буллантIиссар аьралуннавун апрель зурул 1-нния июль зурул 15-ннийн бияннинсса чIумуву. Аьмну аьралуннаву къуллугъ бан тIайла буккантIиссар 3 азарунния ливчусса жагьилтал. Агана аьралуннавун тIайла буккан бувцусса, амма ци-бунугу багьана хьуну, къалавгун ливчIсса бухьурча, ми хъиривмур призыврал чIумал тIайла буккайссар. Призыврая тархъан байссар хушрайсса кьюкьраву бивкIсса ва дачIи шинайсса, ххишалагу, аьралий иширттаву гьуртту хьусса инсантал. Мукунма Донецкаллал ва Луганскаллал Республикардай аьралий къуллугъ буллай бивкIми.
Къуллугъ буллан циняв призывниктал тIайла буккайссар Аьрасатнал аьрщарайсса частирдавун. Аьралуннаву къуллугъ бан наними тIайла буклантIиссар апрель зурул 10-нния тихунмай. Призывниктурал шанма бутIул ца бутIа гьан бантIиссар аьралий техника лархьхьуну, пиша ласун. Дуккаву къуртал дурну махъ, лавхьхьумур хIисавравун лавсун, ми тIайла буккантIиссар аьралуннавун. ЦIанасса призыв нанисса чIумал ишла дантIиссар «Единый реестр воинского учета» паччахIлугърал информациялул система. Мунийну бюхъантIиссар ккалли бансса хIучча бусса инсан призыврал комиссиялул заседаниялийн къаувкIнува махъун утан. Утти призывниктурайн гьан дуллантIиссар электрон повесткарттугу. Агана ккалли бансса багьана бакъанува призыврал комиссиялийн къабучIарча, кьува гьантлул дянив ми буцинсса чаран лякъинтIиссар.
Призыврал хIакъираву цIухху-бусу бан ччисса инсаннаща Аьрасатнал Обороналул министерствалул сайтрай, «Военкоматы» тIисса разделдануву ккаккан бувсса номердай оьвчин бюхъайссар. Апрель зурул 7-нния байбивхьуну, Генеральный штабрал Организациялул ва мобилизациялул агьаммур управлениялул пишакартурал (8(495) 498- 96- 96, 498-96-97, 498-96-98) призыврал хIакъираву бувчIин бавуртту дантIиссар агьалинан.
Дагъусттаннал аьралий комиссариатрал тIайланнасса линия зунтIиссар апрель зурул 7-нния дайдирхьуну гьарица кьини (8-872-263-88-86, 8-872-268-16-07).
Ккаккан дурсса чIумуйсса аьралий къуллугъ лавхъсса призывниктал, цила чIумал итабакьинтIиссар шаппай.
Андриана Аьбдуллаева
