ЦIуссалакрал райондалий хьунни хасъсса аьралий операциялий жанну дуллусса аьралийтурал ниттихъащалсса ва кулпатирттащалсса хьунабакьаву.

Аьралийтурал кулпатирттащал хьунабавкьуну, жижара бунни ЦIуссалакрал райондалул хъунаманал цалчинма хъиривчу Султан ХIамзаевлул, райондалул бакIчинал хъиривчу Макьсуд ХIамидовлул, райондалул прокурорнал хъиривчу МахIаммадрасул Вазировлул, райондалул Депутатътурал Мажлисрал председательнал хъиривчу Сулайман Оьмаровлул, «Защитники Отечества» фондрал социальный координатор, военкоматрал вакил Оьмар Оьмаевлул, «Память гор» организациялул ЦIуссалакрал райондалийсса отделениялул каялувчи Давуд Садаевлул ва мукунма цайминнал.

– Хъунмасса барчаллагь учин ччай ура Ватандалул ххуллий чувшиврий жанну дуллусса къучагъсса арсру тарбия бувсса ниттихъахь. Зул арсурваврал, ласурваврал жанну дуллуссар Ватандалул мурадру, мюхчаншиву ва цашиву дуручлай, ялун нанисса никиран паракьатсса оьрму дузал буллай. Жун мудангу дакIний дикIантIиссар вайннал чувшиву. ТачIав хъамакъабитантIиссар жула аьрщи душманная дуручлай, жанну кьурван дурсса жагьилтал. Вайри жула ялун нанисса никиран эбратрансса патриотътал, – увкунни Макьсуд ХIамидовлул.

Ва кьинисса хьунабакьаврий аьралийтурал ниттихъахьхьун ва кулпатирттахьхьун дуллунни арсурваврал канил дугьан нясив къадурсса Къучагъшиврул орденну, Жуковлул медальлу ва цаймигу паччахIлугърал наградартту.

Хъирив военкоматрал вакилтурал цIухху-бусу бунни цукунсса масъаларттащал хьунабакьлай буссарив аьралийтурал кулпатру. КIицI лавгунни, аьралийтурал кулпатирттан багьайсса ка-кумаг тIалав бан райондалул администрациялийн ва военкоматрайн бучIан бюхъайшиву.
Хьунабакьаврий гьуртту хьуми бия ниттихъал дакIру данмур буслай, аьралийтурал цIарду абад даврил ххуллийсса сиптарду кIицI лаглай.

Имара Саидова