Лахьхьу, цархьхьу школалул парталух щябивкIсса, ссалчIав буруккин бакъасса оьрчIан хIакьину хъуннасса хъар лахъан багьлай бур. Аьра­лий операциялул иширттаву гьуртту хъанахъисса цинявппагу оьрчIру ялун нанисса никиран эбратну хъанахъиссар.

КIулсса куццуй, Ватандалул мюхчаншиву дуруччаврил масъалартту гьаз хьусса ппурттуву, ЦIуссалакрал райондалиясса цикссагу жагьилтурал ккаккан бунни цивппа билаятрал мурадру буруччин хIадурсса хIакьсса патриотътал бушиву. Мукунминнавасса ур ЦIуссалакрал райондалийсса ТIюхчардал шяравасса Шарапуттин ЩайхмахIаммадов.

Школалий хьхьичIунну дуккаврицIун, Шарапуттин ивкIун ур иш багьний чIарав ацIан хIадурсса, аьчухсса хасият дусса, дустуран ххирасса оьрчI. Аграр-экономикалул колледжгу бувккуну, лавгун ур аьралуннаву къуллугъ буллан. Шиккугу ванал аьралий частьрал командованиялул вихшала лайкь дурну, хIурмат-кьиматрай ивкIун ур.
Шарапуттин, цува рязину контракгу чирчуну, лавгун ур хасъсса аьралий операциялий гьуртту хьун. ЦIанасса ппурттуву ва лайкьсса даражалий бартбигьлай ур цала хьхьичI бивхьу­сса аьралий бигарду.

Къаххирар ванан аьралий операциялул иширттая буслай, ниттихъул, ссурвал, махъми гьалак буккан буллан.
ХIакьину аьралитурал къучагъшивурттая буслай бур вайннал лайкь дурсса наградарттал. Аьралий бигарду къучагъну бартбигьаврихлу Шарапуттин ЩайхмахIаммадов лайкь хьуну ур «За отвагу» тIисса медальданун.

Аьралий операциялул иши­ттаву гьуртту хъанахъи­сса хIаллай, цала оьрмулун нигьачIаву душиврух къаурувгун, хьхьичI ххуттай талай, ванал цимиллагу къучагъшивуртту ккаккан дурну дур.

Кьянкьа-кьурчIисса хасият дусса жагьил ччяни аьдат хьуну ур кьянатсса аьралий шартIирдайн. Ца ппурттуву, оьсса талатавриву Шарапу­ттиннуйн кIусса щаву дирну дур. Кару, ччанну, бакI сагъну бушиву бувчIайхту, цIунилгу цала аьралий гьалмахтурачIан зана хьунсса пикри хьуну бур ванан.

ХIакьинусса кьини вирттавран ккалли бан бучIир Шарапуттингу, ванахава лавхьхьусса хасиятру дусса аьралий операциялий гьуртту хъанахъисса жула цинявппагу оьрчIру. ЧIалачIисса куццуй, вай хIадурну бур билаятрал каши-кьудрат гьаз даву, дунияллий хъинчулиннайсса дахханашивуртту даву мурадрайсса иширттавух хIала буххан.
Барчаллагьри, оьрмурдан нигьачIаву дунугу, вас-ццах бакъа Ватандалул мурадру буручлачисса оьрчIан лайкьсса тарбия дуллусса цинявппагу нитти-буттан.
Укунсса патриотътал буссаксса ххувшаву ласунтIи­шиврийнсса вихшала хъиннура цIакь хъанай дур.

Имара Саидова