Декабрьданул 20-нний ЦIуссалакрал райондалийсса ЦIуссаккуллал шяраву аьпалул ула лачIун дунни Украиннал аьрщарай нанисса хасъсса аьралий операциялий чувшиврий жан дуллусса, Ваччиял шяравасса МахIадлул ва Хъусращиял шяравасса ХIамил арс, Кьурбан Кьурбанов ялапар хъанай ивкIсса къатрай.
Виричунал аьпа абад буллалисса митинграй гьуртту хьунни ЦIуссалакрал райондалул бакIчинал хъиривчу Амир Султанов, МахIачкъала шагьрулул Советский райондалул администрациялул бакIчинал хъиривчу Сабир Юсупов, ЦIуссаккуллал школалул директорТатьяна Айгунова, дуклаки оьрчIру, Кьурбаннул нину-ппу, дустал ва мачча-гъанми.
Ватандалул мурадру буруччин, хасъсса аьралий операциялий гьуртту хьун Кьурбан хушрай лавгун ур. Талай ивкIун ур Запорожскаллал областьрайсса дяъвилул иширттаву. Артемовск райондалийсса Хлещовка тIисса шяраву най диркIсса къизгъинсса талатавурттаву къучагъну жан дуллуну дур. Аьралий бурж бартбигьлай ккаккан дурсса чувшиврухлу ванан дуллуссар паччахIлугърал ларайсса награда «Къучагъшиврул орден».
Аьпалул митинграй ихтилат бунни Амир Султановлул:
– ХIакьину жува бавтIун буру хасъсса аьралий операциялий къучагъну жан дуллусса аьраличунал аьпа абад дан. Жула аьралитурал хасъсса аьралий операциялул иширттаву ккаккан дуллай бур чувшивуртту, цала жандалий хIайп къаувкуну, бартбигьлай бур къуллугърал буржру. МахIадлул арснал Кьурбаннул къучагъну жан дуллунни аьралий операциялий Ватандалул мурадру буручлай. ЦIанасса никирангу кIулну бикIан аьркинссар ва эбратну хьун аьркинссар жула вирттал. Жува буржлувссару Ватандалул тархъаншиву дуруччаврил цIаний жанну дуллуминнал аьпа абад буллан. Барчаллагь къучагъсса арс тарбия увсса нитти-буттан, – увкунни ванал.
Хъирив ихтилат бунни Сабир Юсуповлул. Ванал к1ицI лавгунни Ватандалул ххуллий жан дуллусса къучагъ хасъсса аьралий операциялул иширттаву яла къизгъинми талатавурттаву гьуртту хъанай ивкIшиву. Ванал аьралий ххуллу кутIасса ва яргсса бивкIшиву.
Мероприятиялий гьуртту хьуминнал къучагънал аьпалул улттуцI тIутIив дирхьунни, рирщунни дакIний личIансса суратру.
Ахирданий Кьурбаннул ниттил, ХIамил, барчаллагь увкунни арснал аьпа абад бан бувкIминнахь.
ДакIнин бутан, Дагъусттаннал бакIчи Сергей Меликовлул сипталийн бувну, республикалул шагьрурдай ва районнай най дуссар СВО-лий аьралий бурж бартбигьлай жанну дуллусса аьралитурал аьпа абад буллалисса акция.
Имара Саидова
