Декабрьданул 24-нний ЦIуссалакрал райондалийсса Гьамиящиял шяраву, администрациялул бакIчи ХIабибуллагь Рашидовлул сипталийн бувну, Вирттаврал аьпа абад буллалисса мажлис хьунни. Ва кьини 2 аьпалул ула тIиртIунни хасъсса аьралий операциялий буржру бартбигьлай жанну дуллусса Кьурбанисмяиллул арс ХIусайн Шабановлун ва ХIажимурадлул арс Аьппас ХIамзаевлун.
КIиягу аьраличу аьпалул хьуну махъ лайкь хьуну ур Къучагъшиврул орденнан. Ватандалийн кьини дурксса чIумал, ХIусайнгу, Аьппасгу хушрай лавгун бур СВО-лий гьуртту хьун.
ХIусайн Шабанов увну ур 1984-ку шинал июньдалул 24-нний ЦIуссалакрал райондалийсса Гьамиящиял шяраву. Дуклай ивкIун ур Гьамиящиял 1-мур школалий. Ва дуккавривугу, спортравугу, школалул иширттавугу хьхьичIун ливчусса, итххявхсса оьрчI ивкIун ур. ДакI тIиртIусса, аьчухсса ушиврийн бувну, ххирасса ивкIун ур архIал дуклакиминнан.
Аьралуннаву къуллугъ буллай ивкIун ур Ленинградуллал областьрай. Къуллугъ бувну махъ, ХIусайн зий ивкIун ур Ленинградуллал областьрайсса Тосно тIисса шагьрулий.
Украиннал аьрщарай хасъсса аьралий операция байбивхьусса цалчинсса гьантрай хушрай лавгун ур Ватандалул мурадру буручлан. СВО-лия увагу 5 гьантлийсса увкIун ур мачча-гъанминначIан. 2022-ку шинал октябрьданул 12-нний аьралий бурж бартбигьлай жан дуллуну дур ХIусайннул.
Аьппас ХIамзаевлул хасъсса аьралий операциялийсса позывнойгу «Абас» тIисса диркIун дур.
– На увссара Дагъусттаннайсса Гьамиящиял шяраву. Ялапар хъанай уссияв Санкт-Петербурграй. Мобилизация дайдирхьуну, Ватандалийн кьини дурксса чIумал, ттун пикри хьуна нава рязину СВО-лийн гьансса. На кунмасса цаймигу къабачирчан, щилли Ватандалул мурадру буруччинтIисса? Хасъсса аьралий операциялийн ачинсса хIукму байхту, пикри мабару тIий, ичIувами паракьат буллай ивкIра. ХIакьину на чIярусса шиннардий оьбалартту бухIлай бивкIсса инсантал буручлай, жула ялун нанисса никиран рахIатсса бучIантIимунихлу талай ура. МархлуцIакул духлаган дантIиссар шикку тIутIайх дирчусса неонацизм. Ххувшавугу жулла чулийри дусса, – тIий ивкIун ур Аьппас цала интервьюраву.
ХIайп, къучагъсса аьраличунал 2023-ку шинал сентябрьданул 14-нний Донецкаллал областьрайсса Авдеевка тIисса шагьру душманная мурахас буллалисса талатавриву жан дуллуну дур.
Аьппаслул бивкIулул махIрумну личIан дунни нину, кулпат ва шанма оьрчI.
ХIакьинусса кьини Вирттавран ккалли бан бучIир ХIусайн, Аьппас ва вайннахава лавхьхьусса, кьянкьа-кьурчIисса хасиятру дусса, хасъсса аьралий операциялий гьуртту хъанахъисса цинявппагу жула оьрчIру. Барчаллагьри вас-ццах бакъа Ватандалул мурадру буручлачисса оьрчIан лайкьсса тарбия дуллусса цинявппагу нитти-буттан. ХIайп, чувшиву ялтту дурксса арсурваврацIа хьунни вайннал аьзизсса ниттихъул, кулпатру, оьрчIру.
