Уттигъанну Ккуллал райондалийсса Ваччиял школалий Къучагъшиврул ва чувшиврул дарс дирхьунни хасъсса аьра­лий операциялул гьурттучи, СВО-лул Ветерантурал ассоциациялул председатель, Ккуллал райондалийсса «Память гор» жяматийсса ккурандалул вакил Нураттин Рамазановлул. Чувшиврул дарсирал агьаммур мурадгу хъанай бур ялун нани­сса ник ватан ххирану, тарихрал кьимат буну тарбия даву.

Нураттин Рамазановлул дуклаки оьрчIахь бувсунни Украиннал аьрщарайсса тагьардания, хасъсса аьралий операциялул агьамшиврия ва жула аьра­лийтурал чувшиврия. КIицI лавгунни, Аьрасатнал аьралий гужирдал Украиннал аьрщарай­сса неонацизм духлаган даву мурадрай хасъсса аьралий операция баян бан багьшиву. Ихтилатру хьунни ватан ххирашиврия, аьра­луннаву къуллугъ бан аьркиншиврия.

Хасъсса аьралий операция баян бувсса цалчинсса гьантрая байбивхьуну, цайвасса буржру лайкьну бартбигьлай бур Кку­ллал райондалия мобилизоват бувсса, контрактру чирчуну ва хушрай лавгсса аьралийтал. Ванал бувсунни жула аьралийтурал ккаккан дуллалисса къучагъшивурттая.
– Жула аьралийтал къучагъну талай, ккаккан буллай бур цив­ппа ватандалийн дакI тIайласса бушиву, тасттикь буллай бур кьянкьасса низам дусса, тапшур бувсса амру биттур бан хIадурсса, унгу-унгусса патриотътал бушиву. Укунсса къучагътал буссаксса, жула аьрщарайн щилчIав шилтагъсса ша къабизантIиссар. Щак бакъар ххувшаву жура ласунтIишиврий, – увкуна Нураттиннул.

Увну ур Нураттин мартрал 15-нний 1972 шинал 2-мур ЦIувкIуллал шяраву. Ваччиял дянивмур даражалул школагу къуртал бувну, къуллугъ бу­ллай ивкIун ур Ашттарханнай­сса кьюлтIсса аьралий частьраву. Аьралуннава зана хьуну махъ контрактрай къуллугъ буллай ивкIун ур Каспийскаллал дазул аьралуннаву. Шиккусса конктракт къуртал хьуну махъ, Нураттин гьуртту хьуну ур Дагъусттаннал ва Чачаннал аьрщарай личIи-личIисса шиннардий най бивкIсса дяъвилул иширттавух. Къизлярдайсса аьралий ишир­ттаву къучагъшиву ккаккан даврихлу лайкь хьуну ур Суворовлул медальданун. ЦIуссалакрал райондалий дяъвилул ишру най бивкIсса ппурттуву ва ивкIун ур ополчентурал кьюкьравух. Мунияр махъ аьралий иширттаву сивсусса, къучагъсса аьралийчу кьамул увну ур ЦIуссалакрал райондалийсса РОВД-лийн. Шиккугу Нураттин къуллугърал бурж лавайсса даражалий бартбигьлай ивкIун ур.

Каспийскаллал флотилиялул хьхьирил пехоталийхчIин конктракт чирчуну, лавгун ур ватандалул мурадру буручлан.
Аьралий опыт бушиву хIисавравун лавсун, Нураттин найунува ивтун ур Инженерно-саперный разведкалул хъунаману.
Дяъвилул цIу къизгъинну нанисса Херсонский областьрайсса Клинки тIисса шяраву, хьхьичI ххуттай талатисса Нураттиннуйн щаву дирну, махъунай зана хьуну ур.
ЦIанагу Нураттин цалла цIуллу-сагъшиврулсса буллай, паракьатну къаавцIуну, Каспийскаллал флотилиялул хьхьирил-пехоталул штабрал замполитнал кумагчину, хасъсса аьралий операциялий ятIа-тIар бакъа бакъа хьусса аьралийтал ххал буллай, миннал документирттаха зий ур.
СВО-лий ккаккан дурсса къучагъшиврухлу Нураттин лайкь хьуну ур 177-мур штурмовой полкрал чулухасса «За отличие воинской службы» 1-мур даражалул ва «За отвагу» медальлан. Хасъсса аьралий операциялий гьуртту хьуннинсса цаймигу аьралий иширттаву ккаккан дурсса чувшивурттахлу лайкь хьуну ур «За Отвагу», «За отличие в военной службе», «За безупречную службу» медальлан.

Имара Саидова