Куклу машина ва автобус щуну бур

Октябрь зурул 15-нний, ссят 21.00 хьусса чIумал, Бабаюртуллал райондалий, Астрахань-МахIачкъала ххуллий, «LADA Priora», хьунив ххуллийн був­ккун, щуну бур Пятигорскалия МахIачкъалалив нанисса автобусрайн. Ва ишираву куклу машиналул щупIир ва шама пассажир бусса кIанай къуртал хьуну бур.

Цурку увгьуну ур

МахIачкъалаллал Ленинский райондалул полициялул отделданул зузалтрал кIул бувну бур 42 шинавусса адаминал, дакьинсса кIуллигу дурну, МахIачкъалалив кIива квартиралувун увххун, чIярусса арцу ва мусил кьай дарцушиву. Аьмну ванал дарцумунил багьа 900 азарда къурушрайн лахълай бур.
Хъиривлаявуртту дуллали­сса ихтиярду дуруччай органнал зузалтран кIул хьуну бур ва, хьхьичIра план дурну, сант дирияйхту уххайсса ивкIшиву квартирардавун. Ва цала дурмуний мукIру хьуну ур. Дарцусса арцу цанна аьркинмунин харж дурсса бувсун бур. Ва иширал хIакъираву сукку дурну дур «Цурк баву» статьялийн дагьлагьисса уголов дело.

Зузи дунни ххишаласса нарядру

Ххуллурдайсса тагьарданул ялув бацIаву ва ххуллул низамрава бувксса ишру хьун къабитаву мурадрай, федерал ххуллурдай, шагьрурдай ва районнай рейдру дансса ххишаласса нарядру зузи дурну дур Госавтоинспекциялул. Инспектортал хъуннасса къулагъас дуллай бур инсантал ливтIусса ва бивщусса ДТП-тту хьун къаритан.
Ца нюжмардул дянив республикалий 29 ДТП хьуну дур, миннуву 13 инсан ивкIуну ур, цIунцIияртту хьуну дур 3 инсаннан.

Травматикалул пистолетрава бивтун бур

Полициялул органнайн баян бувну бур, Н. Хушет поселокрай къалмакъал хьуну, 32 шинавусса МахIачкъалалиясса цаннал травматикалул пистолетрава ва поселокраясса 48 шинавусса адаминайн бивтунни куну. ЦIунцIия хьума азарханалийн иян увну ур. Бивтма полициялул отделданийн увцуну бувкIун бур. Ва мукIру хьуну ур. КIиягу адамина цаннан ца гъансса бур. Кулпатирттал дянивсса бувчIу-къабувчIурдалшиврий хьуну дур къалмакъал. УвгьуманачIату пистолет зевххуну бур.

Ахьттачунайн щун бувну бур

Октябрь зурул 17-нний, ссят 17.40 хьусса чIумал, «Кавказ» ххуллий Избербашлиясса 28 шинавусса, «ВАЗ-2114» машиналий нанисса, адаминал щун бувну бур машина ххуллу лахълахъисса 73 шинавусса адаминайн. Ва усса кIанай къуртал хьуну ур.

Ххуллу къабуллуну бур

Октябрь зурул 17-нний, ссят 18.20 хьусса чIумал, «Кавказ» ххуллий, Дарбантуллал райондалий «ВАЗ-2106» маркалул машиналий нанисса 55 шинавусса адаминал, хьхьичI итабакьин аьркинсса машиналун ххуллу къабуллуну, щун бувну бур «ВАЗ-2110» ва «ВАЗ-2114» машинарттайн. Ва ишираву «ВАЗ-2106» машиналул щупIир ва мунал пассажир бусса кIанай къуртал хьуну бур.

Экстремизмалул ххуллийн кIункIу буллай ивкIун ур

Октябрь зурул 5-нний Дарбантуллал райондалул судрал Чинар шяравасса С.М. Магомеровлуй АьФ-лул УК-рал 280-мур статьялул 2-мур бутIуйн багьай­сса («Экстремизмалул ххуллийн оьвтIаву») тахсир ккавккунни.
2019-ку шинал апрель зуруй Инстаграмраву ванал рирщуну дур экстремизмалул ххуллийн оьвтIисса материаллу.
С.М. Магомеров цайва тахсир хьушиврий мукIру хьунни. Судрал ва кIира шинай условнайну дуснакь ансса танмихI кьувкьунни.

Къалпсса аьракьи зерххуну дур

Сентябрь зурул 21-нний Къумтуркъалаллал райондалул судрал Тюбе шяравасса С.А. ГъазимахIаммадовлуй АьФ-лул УК-рал 171,1 статьялул 6-мур бутIуйн, 171,3 статьялул 2-мур бутIуйн ва 238-мур статьялул 1-мур бутIуйн багьайсса тахсир ккавккун бур.
2021 шинал дайдихьулий ххалбигьавуртту дуллалисса УФСБ-лул ва МВД-лул зузалтрал зерххуну дур ваначIату къалпсса аьракьи. Вайннул багьа 1,8 миллиондалия ливчу­сса бур.
Судрал ГъазимахIаммадовлуй 3,4 млн аькIлул дирхьунни.

Квартирарду бахлай ивкIун ур

МахIачкъалаллал Ленинский райондалул прокуратуралул ххал бунни цукун щаллу дуллай бурив аьрщарацIун дархIусса законну. Ялун ливчунни закондалул ххуттава бувккун шагьрулул аьрщарайн цалашиврий документ бувсса иш. КIул хьунни, 2017 шинал П.Ш. СалихIовал буллусса тIайла бакъасса МахIачкъалаллал администрациялул бакIчинал постановлениялийн ва цаймигу документирттайн бувну, ДР-лул Росреестрданул Управлениялул Лаптиева кIичIиравусса 350 кв.м. дусса аьрщарал (1 млн ва 450 азарда къурушрансса) заллушиврул документ буллуну бур ца инсаннахьхьун.
Райондалул прокуратуралул тIайла дурксса материаллу ххал дурну, УМВД-лул Силистталул управлениялул 2-мур силистталул отделданул сукку дурну дур Аьф-лул УК-рал 159-мур статьялул 4-мур бутIуйн дагьайсса уголов дело.
2021 шинал апрель зуруя сентябрь зуруйн бияннин МахIачкъалаллал Ленинский райондалул силистталул отделданул сукку дурну дур АьФ-лул УК-рал 159-мур статьялул 3-мур ва 4-мур бутIрайн дагьлагьисса 11 уголов дело. Вай дур МахIачкъалаллал агьалинал чулухуннай А.Г. Махдиевлул хIарамзадашиву даврил хIакъиравусса. 2019-ку шинал январь зуруя байбивхьуну 2021 шинал апрель зуруйн бияннин А.Г. Махдиев, МахIачкъалаллал администрациялул вакилла тIий, инсантал хъяврин буллай, бахлай ивкIун ур шагьрулул администрациялул биялдарайсса личIи-личIисса адресирттайсса квартирарду. Мукун ванал ларсун дур инсантурачIату 18.782 000 арцул. Силистталул кIул бунни вай квартирарду «Ветхое жилье» программа щаллу дан ккаккан бувсса квартирарду бивкIшиву. ЦIанасса чIумал квартирарду шагьрулул администрациялул балансрай бур. Су­кку дурсса уголов делолийн бувну, цIана Махдиевлул хъяврин увсса 13 инсан лявкъуну ур. Вай Махдиевлул хIакъираву показания дуллай бур. Хъиривлаявуртту ттигу най дур.