Информациялул ва печатьрал министерствалий хьунни «Дагестан настоящий» тIисса жагьилтурал патриотшиврул ва туризмалул слетрал хIасиллу дуллалисса пресс-конференция. Слет дуссия октябрь зурул 14-17-нний «Журавли» комплексрай.

Форумрал даврия бувсунни Евгений Гвоздевлул цIанийсса Дагъусттаннал парусрал спортрал федерациялул директор Мухтар Оьма­ровлул, слетрал директор Рустам ХIамидовлул ва арт-директор Казбек Якубхановлул. Слетрал агьаммур мурад бур Аьрасатнал жагьилтал Дагъусттаннал магьирлугъращал ва аьдатирттащал кIул бансса, «хIакьсса Дагъусттан» ккаккан бансса.
«Жул агьаммур мурад бия слетрай гьуртту хъанахъиминнан Да­гъусттаннал агьалинан хъамал ххирашиву асар хьунсса, Дагъус­ттан билаятрал эмаратшиву кка­ккан дансса ва цIусса гьалмахтал лякъинсса куццуйсса программа хIадур дансса», – увкунни Рустам ХIамидовлул.
Мухтар Оьмаровлул бусаврийн бувну, проектрал сиптачи хьуну дусса дур Рустам ХIамидов каялувчисса Дагъусттаннал парусрал спортрал федерациялул ватан ххирану тарбия баврил отдел.
Форумрал ватан ххирану тарбия баврил бутIа хас бувну бур Аьрасатнал машгьурсса хьхьирийх гьузузала Евгений Гвоздевлул аьпалун.
Гьурттучитуран ккаккан дурну дур бусалардавун агьсса хьхьирийх гьузузалал оьрмулиясса фильм ва фотовыставка.
Балжину форумрал программалия бувсунни Казбек Якубхановлул.
Микку хьуну дур хьунабакьавуртту, экскурсияртту, кIулшиву дулаврил ва магьирлугърал мероприятияртту. «Программа сакин дурну дуссия гьурттучитурайн гуж къабагьансса куццуй: Дагъусттаннал хьхьичIунсса инсантуращал хьунабакьинсса ва яла машгьурсса турист кIанттурдайн биян бю­хъансса куццуй. Форум тIитIлатIисса кьини ккаккан дурссар дагъусттаннал магьирлугъ. Хъиривмур кьини гьурттучитуращал хьунабавкьу­ссар СКФО-лул хъамал кьамул баврил индустриялул миллатрал союзрал вакилтал. Вайннал бувсунни хъамал кьамул баврил сервис сакин даврия.
Гьурттучитуращал ялагу хьунабавкьуссар Аьрасатнал Па­ччахIлугърал Думалул депутат АьбдулхIаким ХIажиев, кIийла Олимпий чемпион Аьбдулрашид Садулаев, ДР-лул миллатирттал иширттал министрнал хъиривчу Мурад Шяпиев.
Форумрал лагрулий хьуссар ДАССР хIасул хьуну 100 шин шаврин хасну бувсса заргалтурал ва тIахIунтту дувултрал мастер-классру. Арцу-мусил давуртту даврил мастер-класс хъанай бур ляличIисса проект. Муша­къатсса инсантал лахьхьин дуллай бур цайминнан заргалшиврул кьюлтIшивуртту. Дунияллийх машгьурсса дизайнер Шамхал Аьли­хановлул ккаккан бунни арамтурал лаххиялул коллекция. Коллекция ккаккан буллай буссия слетрал гьурттучитал цивппа», – бувсунни Якубхановлул, мероприятие сакин давриву гьурттушинна дурминнахьгу барчаллагь тIий.
Слетрал махъра-махъсса кьини сакин бувну бур яла машгьурсса кIанттурдайнсса кIива экскурсия – Сулакский каньондалийн ва Дарбантлив. Наниххуллийх кIул бувну бур МахIачкъала ва Буйнакск шагьрурдащал, Чиркейннал бартхьхьирилущал ва каньондалущал. Мичча хъамал бувцуну фореллал хозяйствалийн, хъамалу бувну бур.
Слетрай гьуртту хьуну бур Аьра­сатнал 50 региондалиясса, Калининградрая, Архмур Востокрайн бияннинсса, жагьилтал, цинявппагу – 200 инсан. Аьрзри буллусса 500 инсаннава личIи бувну бур патриот ва турист проектру буми.
Сакиншинначитурал кIицI лавгунни пикри бушиву слет гьарца шинал дуллансса. ДакIний бур проект гьарза-гьарта буллан.