Октябрьданул 26-нний Дагъусттаннал БакIчи Сергей Меликовлул каялувшиврий хьунни республикалий коронавирусрайн къаршисса Оператив штабрал батIаву.
Ваний ххал бивгьунни азарданул хьхьичIалу кьукьин ялун ххи бувсса ссуссукьушиврул чаранну. Ми чаранну кьамул буллай бур республикалийгу, щала билаятрайгу коронавирусрацIун дархIусса тагьар захIматну душаврийн бувну.

Дагъусттаннал БакIчинал тIимунийну, цIанасса ппурттуву республикалий гьаз хъанай бур коронавирусрал инфекциялул ярглийсса щатIи, мунияту аьркинну бур агьалинаву вакцинартту баврил даву ляду­ккан дуван.
Республикалий къашавай хъанахъими гьарза хъанай бушавугу хIисавравун лавсун, Сергей Меликовлул ДР-лул Минздраврайн тапшур бунни цинярда луртанну лавайсса даражалул хIадуршиврий дитан, иш багьукун ми анаварну ишла дуллай байбишиншиврул.
Субъектрал бакIчинал бувсунни мукунма паччахIлугърал каялувчинал цалва хIукмулийну октябрьданул 30-нния ноябрьданул 7-ннийнин къазузи кьинирдуну баян бувну бушиву.
«Эпидемиялул тагьар ялунгу захIматсса хьуншиву чIалай, октябрьданул 18-нний хьу­сса Оперштабрал батIаврий жу хIукму бувссия уттигу цаппара ссуссукьушивуртту ишла дуван. Миннувасса ца дуссия октябрьданул 28-нния тIайла хьуну цаппара жяматийсса объектирттавун ва мероприятияртту дуллалисса кIанттурдайн анжагъ вакцинациялул QR-код бусса ягу къашавай хьусса инсантал битлан аьркиншиврул хIакъиравусса», – кунни республикалул каялувчинал.
Мукунсса кIанттурдуну хъанахъиссар:
– машлул центрду, дукиялул дакъасса хъус-хъиншивуртту розницалий дахлахисса ттучанну;
– жяматрал дукра дукайсса кIанттурду;
– театрду, кинозаллу, спортрал клубру, фитнес-заллу, гьайбат ххуй дайсса салонну ва мукунма цаймигу.
Дагъусттаннал БакIчинал тапшур бунни мукунма респиратор азаргу бакIрай коронавирусран ккалли дуван, мунийн бувну ПЦР –тестирдал хIасиллу тасттикь хьуннин ОРВИ-лущалсса зузалтгу манзилданий зун аьркинссар.
Мукунма бувсунни па­ччахIлугърал каялувчинал ккаккан бувну бушиву вакциналул ххалаххив къабувсса 60 шинавату ливчусса зузалтгу 4 нюжмардий манзилданий зузи буван аьркиншиву, ххалаххив бувну бучIаншиврул.
Гьашину октябрьданул 25-ннийнин республикалий вакциналул ххалаххив бувну бур 496 азаруннаха ливчусса инсантурал – ми хъанай бур вакцинарду буван аьркинминнал анжагъ 27 %. 60 шинавату ливчусса инсантурал вакцинарду бувну бур 89 азараксса инсаннал. Агьалинал ххалаххив булланшиврул хIукму бувну бур идарарттал ххалаххив буван ччисса цалва зузалтран 2 бигьалагансса кьини дулун.
ЦIанасса эпидемиялул тагьардания ихтилат бунни республикалул хъунма санитар хIакин Николай Павловлул. Мунал бувсунни цуми районнай ва шагьрурдай циксса инсантал къашавай хьуну буссарив. Николай Павловлул тIимунийну, махъсса ккаккиярттайн бувну, гьарза хьуну бусса бур 7-16 шинавусса оьрчI-бакI ва 18-29 шинавусса жагьилтал. Мунал мукунма бувсунни азар ппив къахьуншиврул цукунсса чаранну буллан аьркинссарив.
БатIаврий махъ лавхъунни ДР-лул цIуллушиву дуруччаврил министр Татьяна Беляевалгу. Мунил бувсунни циксса инсантал цIана къашавай буссарив ва ми цукун хъин буллай буссарив.
Оперштабрал батIаврий ххал бивгьунни цаймигу масъалартту.