Дагъусттаннайх кьини дурксса чIумал кумаграл ка къатIиртIусса цучIав къавхьунни. Шайнал шаймур буллай, жула халкьуннал чIарав бавцIунни уссурвалсса Чачаннал, Къабардин-Балкьарнал, Къарачай-Чаргаснал Республикарттал, Аьрасатнал личIи-личIисса регионнал агьлу.

Вай гьантрай МахIачкъалалив Къарачай-Чаргаснава дуркIунни 110 тонна щинал. Ми тIайла дурккун дия мархри Ккурккуллал шяравасса Ахьияева (Яхьяева) Миланал ва ванил ласнал Камиллул. 100 тонна аьркин дагьлагьисса кIанттурдайн диян дан, 10 тонна МахIачкъалаливсса ккурккуллан куну, гьан дурну дия вайннал.
Гъанчунал бусласимунийн бувну, чIярусса шиннардил хьхьичI, 1920-ку шиннардий, Ккурккуллал шяравасса ­Хъунма ЯхIияев къалайчишиву дуллан Къарачай-Чаргаснавун лавгун, щаргу дурцуну, тийхва миналул хьуну ур. Ванал 7 арснава шамуннал Буттал кIанттул цIанийссса Хъунмасса дяъвилий жанну дуллуну дур. Шяравун учIан ччайна, хиялгу дузрайн къабувккун аьпалул хьуну ур. ОьрчIавурив мудан бутта гъалгъа тIий ивкIсса Ккурккуллахсса ччаву лирчIун дур.
Рамазан тIима арснал бур шама арс: Муса, Хайсу, Мурадбий. Вай шамагу арцу-мусил мяъданну ххал буллалисса геологталну зий бивкIун бур. Хъунама, Муса, Дагъусттаннал лайкь хьусса геологри. Таний Хизри Шихсаидовлул дуллуссия ванан му бусрав­сса награда. Муса шанна шинал хьхьичI аьпалухьхьун лавгунни. Ккурклиясса гъанчу лявкъуну, дахIаву даврил сиптачи хьуну ур Хайсу тIима арс. Ва 1973-ку шинал шяравун увкIун, гъан-маччанал гьаттайнгу ивну лавгун ур. ТачIав ккурккуллащалсса дахIаву руцан къариртун дур. 1977-ку шинал увкIун ивкIун ур Мусагу. Оьтту-ттурчIавух Дагъусттаннахсса, Ккурккуллахсса ччаву дуллу­сса Милана Мурадбий тIиманал душ бур. Ванилгу хъунмасса хIарачат бур Дагъусттаннайсса гъанчунащалсса дахIаву цIакь дан. Милана, ванил лас Камил ва цаймигу мачча-гъанми бувкIун буссия ларгсса шинал октябрь зуруй МахIаммад Буттаевлун 100 шин шаврин хас дурсса вечерданий гьуртту хьун.
Ккурккуллал жяматрал цIания дакIнийхтуну барчаллагь тIий буру Миланахь ва ванил ласнахь Камиллухь вайннал дурсса чумартсса даврихлу. Ца ххишалану барчаллагь Миланан цила мархри, буттахъал ватан дакIний душиврухлугу.
Зу бувмур цадакьану бацIаннав, барачат бишиннав, каши ххи даннав.

Андриана Аьбдуллаева