Барзвагу къавхьунни «Илчи» кказитрал хьхьичIми номердай ЧIяйннал шяравасса уздан­сса хасиятрал заллу Рамазанова Бадуржигьаннул СВО-лий гьур­тту хъанахъисса жула аьралитуран ссайгъатру тIайла буккаврия чивчуну. Зумаритавал байрандалун хасну аьралитуран Бадуржигьаннул, бакъухъ, аьрайн гьавккуртту, натIухI, миннуцIун чассаг ва личIи-личIисса нацIу-кьацIурдугу дирхьусса, ххуйва-ххуйсса ссайгъатгу хIадур бувну, арснал оьрчIал Загьидинал аьралитурачIан чагъаргу, чивчуну, тIайла бувкссия. Ми дукрарду жула ужагъирттай дуллангума бигьа дакъасса дур. Бадуржигьаннул тIурча, хъун къабивзун, хьхьуния кьини дурну, жула аьра­литуран хъис-бунугу кумаг хьуннав тIий, дакIнийхтуну дуллай бур. Гьай-гьай, буну тIий ва нину, ванил дакIнил гъилишивугу, чанигу цинявннан биллай бур.

Посылкартту хIадур дурну махъ ванил хъунмур буруккин бикIай ми чIун-чIумуй аьралитурачIан тIайла дуккансса. Бадуржигьаннул цалчин аьралитуран ссайгъат тIайла буклакисса чIумал, тихун биян бан бакIрайн лавсъсса инсаннал увкуну бия, ца нюжмардува биян банну куну. Байрандалийн куну, оьрчIру ххари бан бувсса захIмат зия шайхха тIий, хъювсул буклай бия цуппагу. Му ишираву жу мунин кумаг був­ссия посылкартту тIайла дуккан. Бадуржигьаннул посылкартту тIайла дуккаврия хаваргу бакъа, та нукIува ванил ссайгъат биян бан бакIрайн лавсъсса инсаннал оьвкуну бур: «ТIайла буккав ссайгъат, ссайн бивра, ласун учIавав?» – тIий.
Бадуржигьаннул, ссайгъат тIайла бувкшивугу къабувсун, ласун ухьхьу, хIадурнува буссар, – куну бур. Инсаннахьхьун буллусса махъ бацIан баншиврул цIунилгу анавархъиндарай посылкартту хIадур дурну дур.

АьралитурачIансса посылкар­тту диян дан бувкIсса жагьилтал, махIаттал хьуну бия Бадуржигьаннул ца аьнтIикIану, лазилавкьуну бивхьусса ссайгъатру ккавккукун. Укун сахаватлувсса, дугъри­сса давуртту дуллалисса хъамитайпа оьрмулулгу чIивисса бакъар, вай кумагругу ванил так ца цила пенсиялуцIух бур буллай.
Украиннал аьрщарай нани­сса хасъсса операциялуву гьуртту хъанахъисса жула аьралитуран кIилчинни утти ва хъамитайпалул цила харжирацIух хъунисса посылкартту гьан дуллалисса.
Ва ххуллухь Бадуржигьаннул гьан бувсса ссайгъатру бивунни, аьралитурачIан бакъассагу, тиккусса садикирттайсса мюрщи оьрчIачIангу. Жула халкьуннал дугъришиврул, ка-кумаг бан хIадуршиврул, вайннал дуллали­сса чумартсса тIуллал дакI дуллай дур ва гьавас бутлай бур цIанакул та захIматсса кIанттурдай аьралий бигарду бартбигьлагьисса жагьилтуравун.
– Гьарица кьини ниттихъал дакIру гьалак дуккан дуллай дур СВО-лия баллалисса хавардал. Жун, ниттихъан, бувчIлай бур та иширал агьамшиву ва жула жагьилтурал аьралий бигарду лайкьну бартбигьин аьркиншиву. Мунияту, навагу рахIат буккаву мурадрай, чансса-бунугу ттула чулухасса кумаг хIисаврай, дяъвигу къуртал хьуну, жула оьрчIру сагъ-саламатну зана бикIаннав тIий, дуаьрттугу дуллай, гьан буллай бура тайннан ссайгъатру, – тIий бур Бадуржигьан.

ХIакьинусса кьини хасъсса операциялуву гьуртту хъанахъисса жула аьралиталгу кIулну бикIийча, Ватандалий вайннах укун уздансса нинухъру, ппухълу, ссурвал, уссурвал, оьрчIру ялугьлай бушиву.