[dropcap]М[/dropcap]ахIачкъалалив, Ися Идавсил (аь.с.) цIанийсса РувхIанийсса центрданий апрель зурул 19-нний хьусса жагьилтурансса ифтарданий гьуртту хьунни ацIазарунниха ливчусса жагьилтал. Ва давугу дурну дия шагьрулул администрациялул, Спортрал, туризмалул ва жагьилтурал иширтталсса буллалисса управлениялул Муфтиятращал уртакьну.
[dropcap]М[/dropcap]ероприятие дачин дурну ия машгьурсса тележурналист, продюсер, нашидру учайсса Султан Трамов. Аьдатрайн бувну, мероприятие дайдирхьуна мубараксса Кьурандалул аятирттая. ХIапизтурал республикалул конкурсрай ххув хьусса Шяпи Иманаьлиев ия аятру ккалайгу.
[dropcap]М[/dropcap]ахIачкъалаллал мэрнал цалчинма хъиривчу Мавлидин Маликовлул, спортрал министрнал хъиривчу ХIайдарбаг ХIайдарбаговлул, МахIачкъала Шагьрулул депутатътурал мажлисрал председатель Марис Илиясовлул, Халкьуннал мажлисрал депутат Султан Ибрагьимовлул, бавтIцири барча буллай, кIицI лавгуна жагьилтурал гуж, кьуват, исламрал ххуллу-ххуттаягу хIура къавхьуну, кувннал кув бугьавриву бушиву. МаслихIатрайсса ихтилатру бувна исламрал элмурдал доктор МухIаммад Урминскийл, МахIачкъала шагьрулул Имамтурал советрал хъунама МухIаммадаьрип Сиражуттиновлул, Муфтиятрал просвещениялул отделданул каялувчи ХIусайн ХIажиевлул. Вайннал барчаллагь увкуна ифтар лавайсса даражалий тIайла дуккансса хIарачат бувцириннахь.
ХьхьичIунсса гьурттушинна дурну дия исламрал вузирдал студентътурал. МИК-рал ва ДГИ-лул студентътурал дагъусттаннал этностильданийсса фотозона хIадур дурну дия, шакиллу рищун ччинал рищуншиврул. Ссихьри дуван лахьхьин буллалисса мастер-класс ккаккан бувна вайннала. Султан Трамовлул, Руслан ХIасановлул, Аслуттин Юсуповлул, Рамазан Мажидовлул ва Абакар Кьурбанадамовлул щаллу бувна нашидру. Спонсортурая дия бахшишругу: чIиви хIажлийнсса путёвка, айфонну. Ифтарданул сиптачитал барчаллагьрай бур волонтёртурайн ва чIарав бавцIуцириннайн.
