[dropcap]М[/dropcap]айрал 1-нний 80 шинал юбилей кIицI лагантIий ур Дагъусттаннал балугърал промышленностьрал каялувчину ч1ярусса шиннардий зий ивк1сса гьунар бусса сакиншинначи, МахIаммадлул арс ХIажибутта ХIусайнов. Вай шиннардий бивтсса ххуллу тIурча, бур хъуннасса лахъазаннуну – аькьлулулгу увччуну, оьрмулул опытгу хьуну, му хъирив нанисса никирахьгу кIибачIин бюхълахъисса.
Увну ур ХIажибутта цIанихсса ГьунчIукьатIрал шяраву.
Буттал шяраву школагу къуртал бувну, 1961 шинал ва дуклан увххун ур Москавуллал Гидромелиоратив институтравун. Дуклайгу ивкIун ур хьхьичIунну, къуртал бувну бур институт 1967 шинал лавайсса кьиматирттай. Дуклакисса кIанттурдай группалул комсоргнугу, старостанугу ва итайсса ивкIун ур. Студентътурал кьюкьлуву Къазахъисттаннал целиналул иширттавух гьурттушинна даврихлу лайкь хьуну ур «За освоение целинных земель» тIисса медальданун.
Институт къуртал бувну махъ ва тIайла увккун ур Дагъусттаннал «Каспрыба» тIисса балугърал хозяйствалул управлениялийн. Зий ивкIун ур Машинно-мелиоративный станциялий мастерну. Даврих творчествалул зумуну уругайсса, цалла кIулшивуртту усттарну ишла дуллалисса ва чIирисса чIумул мутталий гьаз хьуну ур «Дагрыбпром» объединениялул генеральный директорнал хъиривчунал къуллугърайн. ДакIнийхтуну буллалисса захIматрахлу ванал хIалал дурну дур СССР-данул «Минрыбхозрал» чулухасса «Отличник социалистического соревнования Министерства рыбного хозяйства СССР» тIисса лишан.
1990 шинал ва СССР -данул ХIукуматрач1асса Шяраваллил хозяйствалул академиялуву дуклан т1айла увккун ур. Стажировкалий ивкIун ур Италиянаву.
1982 шинал ХIажибутта ивтун ур Дагъусттаннал «Дагрыбпром» объединениялул генеральный директорну. Шикку ванаща бювхъуну бур мяйжаннугу цала бюхъу ва гьунар ккаккан буван. ЦIусса технологиягу ишла дурну, бювхъуну бур Дагъусттаннай цалчин бярав чавахъру лувгъи буллалисса шартIру щаллу дуван.
1990 шинал ва СССР-данул ХIукуматрач1асса Шяраваллил хозяйствалул академиялуву дуклан т1айла увккун ур. Стажировкалий ивкIун ур Италиянаву.
1996 шинал ва зана хьуну ур цалла дакIнил ларсъсса отраслилий зун. Ва ивтссар Балугърал портрал каялувчину. Оьрмулухсса цала зумунусса ургаврийну ХIажибуттал хIалал бувссар дагъусттанлувтурал чулухасса ва хIурмат ва бусравшиву. ПаччахIлугърал чулуха лайкь хьуссар наградарттан ва цIардан. Ва хъанахъиссар «АьФ-лул балугърал хозяйствалул хIурмат лавайсса зузала». Ванан дуллуссар «АьФ-лул балугърал хозяйствалул лайкь хьусса зузала» тIисса цIа.
[dropcap]П[/dropcap]енсиялийн укканнин, Портрал каялувчину усса чIумал, ХIажибуттал чялишсса гьурттушиву дурссар цала шяраваллийн багьайсса масъалартту щаллу буллалисса иширттавух. Хаснува билаятрал тарихраву дахханашивуртту хьусса, захIматшивуртту ялун дирсса 90-ку шиннардий. Му чIумал, щарнил жяматращалгу маслихIат ккавккун, сакин дурссар «Община Унчукатль» тIисса суккушинна.
КIицI бан багьлай бухьунссар суккушиндарал даву ялун лирчушиву, председательну ХIажибутта ацIайхту. Ва къуллугърай ва зийгу ивкIссар 2007 шинайн иянцIа. ХIажибуттал хозяйственник хIисаврайгу, каялувчи хIисаврайгу аьлттуну чIалачIи бувссар цалва бюхъу-бажар. Суккушиннагу ххуттавун дагьну, дуллалимур ва данмур мяълумну чIалачIисса, жяматрал ва дазул кьатIувсса шяравучутурал мурадру щаллу буллалисса организациялийн кIура дарссар. Мугу ХIажибуттал хIарачатрайнур хьусса.
2017 шинал, ацIнияхъайсса шинну лях ларгун, жяматрал ва цIунилгу увчIуссар суккушиндарал председательну. ЦIуницIакул айивхьуссар шяраваллил инсантурал мурадру щаллу буллай.
Агьамсса давуну хьуссар шяраву «Аллея славы» баву. Трассалия тIайла хьуну, шяравунсса ххуллул кIивагу чулух дургьуссар мурхьирдал кьюкьри – цинявппагу 272 мурхь, гьарца мурхь Хъун дяъвилул ца ветераннан хас бувну. Шадлугърал тагьарданий тIивтIуссия 2019 шинал ва аллея, СМИ-лул зузалтгу, хъамалгу бавтIун.
ХIакьинусса кьинигу ХIажибутта ур суккушиндарал председательну. Кумагчитуращал архIал дачин дурну ур жяматран дакъа чара бакъасса давуртту. Шяраваллил тарих, ниттил маз, аьдатру, эбадатру ядаву ванал цайвасса буржну ккалли бай. КIицI лагай Шяраваллил кьини, хьунадакьай Ххувшаврил байран, барча дувай машгьурсса шяравучутурал юбилейрду, бувай цайми-цаймигу иширттан хасъсса мажлисру.
КIицI бан багьлай бухьунссар, щарнил жяматращалгу маслихIат ккавккун, 90-ку шиннардий сакин дурсса «Община Унчукатль» тIисса суккушиндарал даву ялун лирчушиву председательну ХIажибутта ацIайхту.
Уттигъанну тIурча, Дагъусттаннал чIяву миллатирттал цIаний бивхьусса захIматрахлу ва лайкь унни «Народный герой Дагестана» тIисса цIанин ва юбилярнай лавчIунни мусил цIуку.
КIицI къалавгун къабучIихьунссар ХIажибуттал кулпатравусса багьу-бизугу. Ва ур эбратрансса ласгу, ппугу, гъанчугу. Цала кулпат Саидащал, цаннал ца лавсун, нахIу-хIалимну яхъанай вайннал хьуну дур 50 шин. Лагма-ялттунан пахрулунну хъуни бувну бур арс ва душ, бур оьрчIал оьрчIру. ЛичIинува кIицI ан багьлай бухьунссар ванал арс –дагъусттанлувтурангу хъинну бусрав хьусса ХIажимахIаммад ХIусайнов, ДР-лул вице-премьерну зий ивкIсса. Ва къуллугърай зузиссаксса хIаллай ХIажимахIаммад дагъусттанлувтуран дакIний ливчIссар тIалавшинна дусса, республикалий дакI цIуцIисса, ватандалул цIаний хъиншиву ва хъинбала буллалисса каялувчину. ХIакьинусса кьинигу ХIажимахIаммад ХIажибуттаевич ккаллину ур хьхьичIунсса каялувчинан, зий ур АьФ-лул Архмур Востокрал ва Арктика хьхьичIунмай баврил министрнал цалчинма хъиривчуну. Уттигъанну, Аьрасатнал Президент Путиннул указрайн бувну, ванан дуллунни «Действительный государственный советник Российской Федерации 2 класса» тIисса чин.
ХIажибуттал арс –дагъусттанлувтурангу хъинну бусрав хьусса ХIажимахIаммад ХIусайнов, ДР-лул вице-премьерну зий ивкIссар. ХIакьинусса кьинигу ХIажимахIаммад ХIажибуттаевич ккаллину ур хьхьичIунсса каялувчинан, зий ур АьФ-лул Архмур Востокрал ва Арктика хьхьичIунмай баврил министрнал цалчинма хъиривчуну.
ХIажибуттал душнил Марияннул къуртал бувну бур Медициналул академия ва Москавуллал авиационный институт. Ва зий бур паччахIлугърал къуллугърай.
Жула учай, гьарцагу чувнал цала оьрмулуву дан аьркинссар шанна зат: мурхь бугьан, къатта буван ва арс тарбия ан куну. ХIажибуттал тIурча, цайвасса бурж ххину-ххишаланугу щаллу бувну бур – бувгьуну бур щаллусса аллея мурхьирдал, дурну дур шяраву ххаллилсса къатри, арсгу гьарцанналгу цала хьурдай чинсса куццуй тарбия увну ур.
Юбилейгу барча дуллай, чIа тIий буру ХIажибуттан, уттинин куна, чантI увкуну зун, занан бюхълахъисса оьрмулул шинну!
Зиябуттин ХIажимирзаев
