Ларгсса нюжмаркьини Мубараксса Рамазан зурул гьантрай республикалийн увкIун ия Каирдал Хъун мизитрал имам, Кьуран букку, машгьурсса нашидру уку, Египетнавасса щайх Мустапа Атеф.
Дагъусттаннайн ванайн оьвкуну бия Дарбантлив хьунтIисса республикалул даражалийсса ифтарданий гьуртту хьун. Сант дирирну дунура, Мустапа Атеф увкIунни МахIачкъалаллал Хъун мизит ккаккан, таравихI чак бан, дуаьртту дуккин. Буниялагу, асар хьунсса такьвалий дурккунни ванал таравихI чаклил дуаьртту.
Хъиривмур кьини Мустапа Атеф хьунаавкьунни Дагъусттаннал гуманитар институтрал каялувчитуращал. Ректор НухIкьади Бахмудкьадиевлул бувсунни вузрал даврия.
Атефлул кIицI лавгунни, Дагъусттаннайнсса цалчинсса аьрххилия пашман къавхьушиву ва хъинну ххарисса асарду хIасул хьушиву.
Ва хьунаавкьунни вузрал студентътуращалгу, бувсунни вайннахь цала даврия. КIул хьунни студентътуран ва, нашидирттайну акъассагу, Кьуран лахьлай, исламрал элмурдахун куртIну агьсса инсан ушиву.
Гъирарай дуллунни ванал студентътурал суллахьхьунсса жавабругу. Хьунни вания мюнпатсса ва дакIний личIансса хьунабакьаву.
ДГИ-лул ректорнал бусравсса хъамаличунан дуллунни дакIний личIансса бахшиш.
