Къуллугъ баврил сий гьаз дуллан
[dropcap]В[/dropcap]ай гьантрай ДР-лул Халкьуннал Мажлисрал депутат Марат Илиясов хьунаавкьунни Лакрал райондалул бакIчинал хъиривчу Явсупи ХIамзаевлущал. Ихтилат бия контрактрай аьралий къуллугъ бан лагаврил ялув шяраваллаву жагьилтуращал зузаврил хIакъиравусса.
Явсупи ХIамзаевлул бувсунни цукунсса суаллащал буклай буссарив аьралий бурж лахъаврил ва контрактрай къуллугъ баврил ялув инсантал аьралий комиссариатрайн. Ванал кIицI лавгунни цалчинсса контракт чичайсса душиву аьралий бурж лавхъун махъ найдунура. Контракт чичин бучIину бусса бур аьралий бурж лавхъун цаппарасса чIун ларгун махъгу. ХIакьину контрактрай къуллугъ бан ччиминнаща бюхълай бусса бур цанна мюнпатсса шартIирдай язи дугьан кутIасса ягу лахъисса чIумуйсса контракт. Контрактрай къуллугъ бан наниминнан, захIматрал хIакь къахIисавну, ккаккан дурну дусса дур социал хIаллихшиннарду, цIуллу-сагъшиврул страховка, дусса дур къуллугърал лахъ хьунсса каши. Контрактрай къуллугъ бан ччими кьамул буллай бур гьарца кьини аьралий комиссариатрал къатраву. ХIакьину контракт чичин бюхълай бусса бур 60 шинал оьрмулувун бияннинсса чиваркIуннаща.
Му бакъассагу, ихтилат бия апрель зурул 1-нний дайдирхьуну, июль зурул 15-ннийн дачинтIисса интнил призыврая. Интнил призыв нанисса чIумуй Аьрасатнал аьралуннаву къуллугъ буллан Лакрал райондалия уцин ккаккан увну усса ур 25 инсан. Ми къуллугъ буллан тIий бусса бур так Аьрасатнаву. Аьралий бурж лахълахъисса солдат тIайла къабуккан тIий бусса бур СВО-лийн. Къуллугъ бан ккаккан дурсса чIунгу лирчIун дусса дур тара – ацIния кIива зуруйсса.
Марат Илиясовлул оьвчаву дунни кIантту-кIанттурдай агьалинащалсса информациялул даву гужлан дан. «РувхIанийсса идарарттал ва жяматрал вакилтал кIункIу бувну, аьркинссар къуллугъ баврил сий гьаз даврил ххуллий зун», – увкунни ванал.
Ппухълуннал аьпалун лайкьну буккан
Лакрал райондалул бакIчи Юсуп МахIаммадовлул каялувшиндаралу хьунни райондалул призыврал ялув зузисса комиссиялул батIаву. Муний гьуртту хьунни аьралий комиссариатрал, райондалул администрациялул, цIуллу-сагъшиву дуруччаврил, кIулшиву дулаврил идарарттал зузалт.
Юсуп МахIаммадовлул ихтилат бунни призывниктуращал, кIицI лавгунни аьралуннаву къуллугъ баву хъанай бушиву гьарца цIуллусса чувнал лайкьну лахъан багьайсса буржну.
– Интнил призыврал кампания – му хъанахъиссар 18 шиная 27 шинайн бияннинсса чиваркI аьралуннаву къуллугъ бан буцаврил ялув гьарца шинал дан ккаккан дурсса мероприятие. Аьралий бурж лахълахъисса солдат къабуцлациссар СВО нанисса кIанттурдайн ва Донецкаллал, Луганскаллал халкьуннал республикарттай, Запорожскаллал ва Херсоннал областирдай дирхьусса аьралий частирдаву къуллугъ буллан.
«Аьралуннаву къуллугъ буллан нанисса оьрчIан чIа тIий ура аьралий школа лайкьну буккинсса тIайлабацIу. ХIакьину жула паччахIлугърал ялун дуркIсса жапасса чIумал тачIав бакъачIин агьамсса ишну хъанай бур ватан дуруччултрал, ватандалул махъ бацIан бюхъайминнал ник тарбия даву. Аьралуннаву къуллугъ баву – му хъанахъиссар хасият сасан дуллалисса, душманнаяр ххув хьусса жула ппухълуннал аьпалун лайкьну буккан лавсъсса хъинну жаваблувсса ша», – увкунни Юсуп МахIаммадовлул.
ЧIал къавхьуну тIайла буккан тIий бур аьралуннаву къуллугъ бансса цIуллушиву дусса, махъаллил хьун бучIи къабуллалисса призывниктал Аьрасатнал Федерациялул аьралий гужирдаву къуллугъ буллан. ЦIанасса чIумал призывниктал бур райондалул азарханалий комиссия буллай.
Райондалул призыврал комиссия ихтилат буллай бур гьарцаннащал. Райондалул бакIчинал барчаллагь увкунни призыврал комиссиялул вакилтурахь, интнил призыврайн дагьайсса даву сакиншиндарай дуллай бушиврухлу.
Мурхьру бувгьунни
Космонавтикалул кьинилун хасну Муса Маннаровлул цIанийсса Гъумучиял школалул лагма-ялтту 9-10-ми классирттал дуклаки оьрчIал бувгьунни мурхьру. Школа тIивтIуния шийннай шикку цIакь хьуну дур хъинсса аьдат – гьарца шинал апрель зуруй, школалул лагма-ялттусса кIантту ххуй-хъингу бувну, мурхьру бугьлагьисса.
Бувгьуну бур 60 кIялагьи, 10 ахъвазандалул ва 10 бяълилул мурхь.
Школалул администрация ва коллектив барчаллагьрай бур ЧIарттал школалул учитель Керамуттин АхIмадовлуйн, бугьансса мурхьру пишкаш баврихлу.
Учительтал дакI дарцIуну бур бугьараминнал хъинсса давурттал эбратрай дуклаки оьрчIавугу тIабиаьтрахсса хIурмат тарбия банссар тIий.
Космонавтнал музейраву
Космонавтикалул кьинилун хасну ШавкIуллал школалул оьрчIру бувцунни Муса Маннаровлул музейравун. Дуклаки оьрчIан экскурсия сакин бувну бия ниттил мазрал ва литературалул учитель Дайгинат Какваевал.
Музейрал хъунмур Аьбидат Макаевал оьрчIахь бувсунни космонавтнал оьрмулия. КIицI лавгунни Муса Маннаров хьуну ушиву яла лахъисса мутта аьламраву бувтсса космонавт – 365 гьантта ва 23 ссят. Мунихлуну лавсун ушиву Гиннеслул рекордирттал луттирайн. ОьрчIал гъирарай ххал дурунни Муса Маннаровлул затру, аьламраву ларххун ивкIсса лаххия.
Шиккува кIицI бан, Лакрал райондалул цинявппа школарттай ва Гъумучиял кIивагу детсадрай дирхьуссар Космонавтикалун хас дурсса дарсру.
