Апрель зурул 12-нний «Аьрасат – ттул тарихри» тIисса музейраву кIицI ларгунни Космонавтикалул кьинилун хас дурсса личIи-личIисса мероприятияртту.
Космонавтикалул байрандалун хасну тарихрал музейрал хIаятраву хьунни «Созвездие талантов» тIисса асфальтрай суратру дишаврил конкурс. Шикку гьуртту хьунни шагьрулул школарттал дуклаки оьрчIру. ОьрчIал дирхьусса космосрал, жамирдал, планетарттал суратирттайну чIюлу бувну бия тарихрал музейрал хьхьичIсса майдан. Суратру ххал диргьуну, конкурсрал даврин кьимат бивщуну махъ, дуклаки оьрчIахь космонавтикалул авадансса тарихрая бусласисса ихтилатру бунни музейрал зузалтрал.
Хъирив дунни оьрчIахьхьун аьламраясса ва космонавтътураясса суаллу буллалисса викторина. Бахшишру дуллай, ххари бунн тIайласса жавабру дуллусса оьрчIру.
ОьрчIан ххаллилсса пишкашну хьунни музейраву Космонавтикалул кьинилун хасну тIивтIусса планетарий. Шиву ккаккан дуллай бия аьламрал караматшивуртту ва дунияллул космонавтикалул тарих.
Ва кьини музейраву оьрчIан укра ккаккан дунни космосраясса кино ва мультфильмру.
Шадлугърал даражалий паспортру тапшур бунни Аьрасатнал дуклаки оьрчIал суккушиндарал члентуран.
Дуклаки оьрчIахь аьламраясса тамашасса затру бувсунни лектор-экскурсовод Роберт МахIаммадовичлул.
