Дагъусттаннал культуралул волонтёртал Москавлив #МЫВМЕСТЕ тIисса Дунияллул халкьуннал дянивсса форумрай гьуртту хьунни. Форум 4 гьантлий най дуссия, декабрьданул 4-нний дайдирхьуссия форумрал даву. Ваний 85 билаятраясса 10 азара волонтёр гьуртту хьунни, миннавух культуралул волонтёрталгу. Тиккува хьхьичIунминнан дуллуна премия #МЫВМЕСТЕ. Культуралул программа дакъагу, форумрай дия цIу-цIусса проектирттал презентацияртту, арт-объектру, викторинарду.

– Жу хIарачат буварду форумрайсса циняв площадкарттайн биян. Мастер-классру бия мюнпатсса. Волонтёртурал даврил опытрая буслай бия, жугу мастер-классругу ккаккан буварду, жулвамур опытраягу бусарду. Ххарину буру чялишну гьуртту хьун бюхъаврия, – увкунни «Культуралул волонтёртал» ВОД-рал Дагъусттанналмур отделениялул хъунмур Гульнара Аьлиевал.