Бархъаллал цIа машгьурну дур щалагу дунияллийх ххаллил­сса тIахIунтту дувулт хIисаврайгу, кару мусилсса заргалтал хIисаврайгу, чансса бакъар кIичча бувксса цIанихсса арсру, душру.

Амма чIявучин къакIулхьунссар цIанихсса Новосибирскаллал паччахIлугърал опералул ва балетрал академический театрданул (НОВАТ) солистка, «Insuia Magica» ва «Маркелловы голоса» тIисса ансамбльлал артистка София Бачаевагу бархъарадуш бушиву.

Бувну бур София Петро­павловск-Камчатcкалий МахIа­мма­­дил ва Людмилал кулпатраву. Бархъаратусса МахIаммади, Ленинградрай Аьралий институт бувккуну махъ, гьан увну ур къуллугъ буллан Ттуплислив, миччагу – Камчаткалийн. Тикку бувну бур София ва ванил уссу Арсенгу.
Бачаевхъал кулпат 90-ку шиннардий бивзун бур Новосибирскалийн.
МахIаммади зий ивкIун ур кIира кIанттул телекомпаниялул директорну, яла махъ – театрданул сценаристну. Людмилагу дуки-хIачIиялуцIун дархIусса Москавуллал филиалданул директорну бивкIун бур.

Шаппа ичIаллил кушурду буллалийни, мудан музыка лахъайсса бивкIун бур Людмилал. Ванин цимилгу хIисав хьуну бур, цила пластинка дишайхту, чIивисса душ, пахъ багьну, музыкалух вичIи дихьлай бушиву.
Махъ яла Софиял чIугу, ванил балайлул чулухунмайсса гьунаргу хIисав хьуну бур школалий вокалданул дарс дихьлахьисса учительницан. Ванил маслихIат бувну бур Софиял ниттихь ва эстрадалул вокалданул студиялийн занази бува куну. София чIявуну гьур­тту шайсса бивкIун бур школалул мероприятиярттай, шагьрулул лагрулийсса конкурсирдай ва музыкалул фестиваллай. Душнил музыкалухсса гъира-шавкь чIалай, нитти-буттал занази бувну бур ва музыкалул школалийн. Школа къуртал бувну махъ ца-кIира шинай зийгу бивкIун, София бувххун бур М.И. Глинкал цIанийсса Новосибирскаллал паччахIлугърал консерваториялувун. ВаницIун архIал Софиял къуртал бувну бур юридий факультетгу.
2017-ку шиная шихунмай ва бур Новосибирскаллал Опералул ва балетрал театрдануву зий.

Ванил 10-нния лирчусса опералул партиярду щаллу дурну дур сахIналий. Миннувух дур тамашачитуран ххуйну кIулсса Франческа (Рахманиновлул «Франческа да Риминилувасса»), Иоланта (П. Чайковскийл «Иоланталувасса»), Татьяна (П. Чайковскийл «Евгений Онегиннувасса»).
София Бачаева бур «Парадиз» тIисса театрданул премиялул («Музыкалул театрдануву яла ххуймур дебют» номинация) ва «Короли изящных искусств» премиялул лауреат.
София Бачаевая чивчуну бур «Континент Сибири» тIисса шагьрулул кказитрай. Ва тIалавну бур, ванил цIа ялу-ялун машгьур хъанай дур. Опера ххирами Софиял ххари буллай бур цIу-цIусса партиярдайну. Махъсса ппур­ттуву ванил ххари бунни цила тамашачитал «Кармен» опералуву Микаэлал партия щаллу даврийну. Музыкалухсса гъира, ва чулухунмайсса гьунар Софиян буттая бивхьунссар. МахIаммадил ва ванал уссу Шамиллул цила чIумал бувккуну бур музыкалул школа. Ххуйну руцайсса диркIун дур макьанну пианинолий, бищай­сса бивкIун бур скрипка. Софиял буттал ппу ХIасаннул уссил Аьлиллул бусласимунийн бувну, Софиягу, МахIаммадигу гъинттул Бархъарав бучIан ччай бивкIун бур, амма, ванил гастроллу сававну, бучIан къавхьуну бур.

ЯлунчIил бучIан дакIний бур. Умуд бур Дагъусттаннайн бувкIсса Софиящал жущавагу хьунабакьин бюхъанссар тIисса.
Ванала бусласимунийн бувну, вава ххуллийх лавгсса Бархъарату цаймигу бусса бур. ХьхьичIва Ашхабадрай Опералул ва балетрал театрдануву зий ивкIун ур Ссаламхъал Аслан, цIанагу Санкт-Петербурглив зий усса ур Бархъаратусса Шамиллул арс Аьли МахIаммадов. Цаппара шиннардил хьхьичI ванал концерт дуссия МахIачкъалалив. Таний «Илчи» кказитрай дуркссия ванащалсса интервью..
Дагьанхьуви та-дунугу цал уттигу ванащал хьунабакьин­сса сант.