Вай гьантрай цила оьрмулул 70 шинал юбилей кIицI ларгунни КIамахъаллал шяраватусса, сайки 40-нниха лирчусса шиннардий Сангардал школалий ниттил мазрал дарсру дихьлахьисса Айгунова ПатIимат МахIаммадлул душнил.
Бувну бур ва КIамахъаллал шяраву 1952-ку шинал декабрьданул 1-нний. Байбихьулул школагу буттал шяраву къуртал бувну, чIаххуврайсса Уриннал школалий къуртал бувну бур 8 шинал школа. Вания махъ дуклан бувххун бур Буйнакскаллал Педагогикалул цалчинмур училищалувун. Дуккаву къуртал дурсса 1975-ку шинал ПатIимат тIайла бувккун бур Гъуниннал райондалийсса КъалатIиял школалий зун. Бабаюртуллал райондалийсса КIамахъаллал ва Ппалассуннал къутандалий школа тIивтIусса хъиривмур шинал ва бучIан бувну бур Лаккуя.
ПатIимат МахIаммадовна Сангардал школалий зий буссар 1976-ку шиная шийнмай. Вайксса шиннардий педагогнал пишалий зузисса ва лайкь хьуссар «Аьмсса кIулшивуртту дулаврил аралул хIурматрайсса зузала», «ДР-лул дуккаврил отличник» ва «ДР-лул лайкь хьусса учитель» тIисса цIардан ва республикалул даражалийсса личIи-личIисса конкурсирттай ва олимпиадарттай хIурматрал грамотарттан ва лишаннан. Ва хъанахъиссар Сангардал школалул учительтурал коллективрал насихIатчинугу, жагьилсса учительтурал маслихIатчинугу. Хъунмасса хIурмат буссар ПатIимат МахIаммадовнал лагма-ялттусса щархъал школарттайгу. ХIакьину 60-хъайсса шиннардивун бувхсса, лахьхьу ванил ученикталну бивкIсса оьрчIан, цIанагу школалий дуклакиминнан ПатIимат МахIаммадовна ххирассар ва хъунмасса хIурмат буссар.
Ниттил маз ва буттал улча ххирасса ванил хъунмасса хIарачат бувссар Сангардал школалий хьхьичIара жула хъунмур никирал ишла дуллай бивкIсса матахI, тIахIни, хьхьичIазаманнул янна-ус цачIун дурсса музей тIитIингу. Вагу аривсса школалий зунттал агьулданул багьу-бизу ккаккан буллалисса, буттал буттахъал оьрмулуву ишлану диркIсса хъус ккаккан дуллалисса кюрттаран хIисавссар.
ПатIимат МахIаммадовнал дарсру дирхьусса чIявусса оьрчIру, душру дуклан бувхссар ва цIанагу дуклай буссар ДГУ-лул ва ДГПУ-лул факультетирттайсса лакралми отделениярттай. Вагу, махъ бакъа, ниттил маз ххира хьун бан ванил бивхьусса захIматрал ахъулссар.
Уттигъанну кIицI ларгсса Ниттил кьинилущал ва 70 шинал юбилейращал ттулагу, ттущала архIал дуклай бивкIминнал чулухагу хIурмат хъунмасса ва мудангу дакIнийвасса ПатIимат МахIаммадовна барча буллай, цалчинва-цалчин цIуллушиву чIа учин ччай бур. Ина вания тихунмайсса оьрмулувугу оьрчIал ва оьрчIал оьрчIал ххари буллай битаннав. ТIайлабацIу баннав ва ттигу чIярусса шиннардий винма ххирасса пишалуха зунсса гъира-шавкь чан къахьуннав!
