Ниттихъал байрандалул кьини Украиннал аьрщарай нанисса хасъсса аьралий операциялуву къуллугърал бурж бартбигьлагьисса ЦIуссаккуллал ва Гьамиящиял шяраваллавасса аьралитурал ниттихъащал хьунабавкьунни ЦIуссалакрал райондалул социал къуллугърал ва шяраваллал администрациярттал зузалт.

Ва кьинисса байрандалул сакиншинначитурал, ниттихъул барча буллай, чIа увкунни цIуллушиву, талихI, тирхханну, дунияллий паракьатшиву ва оьрмулуву хьунадаркьусса захIматшивуртту хъамаритансса ххаришивуртту ялун дияву.
Аьралитурал ниттихъул хъис-бунугу ххари баву мурадрай, вайннан хас дурсса концерт ккаккан дунни социал къуллугърал зузалтрал.
Цахара дурсса къулагъасрая рязисса ниттихъалгу цала чулуха дакIнийхтунусса барчаллагь увкунни байрандалул сакиншинначитурахь.