Гьантта бувккуну тIиссакссагу, цалнияр цал цIакьну цила бияла кIунттихьхьун ласлай дур кIи. Ва чIумалсса жулва багьу-бизу куклу буван, дакIнил макьу ларай дуван кунмасса маслихIатругу къачIявуну чIаланссар.
* * *
КIинттул уссацIун лавчIсса марххалттания, шаппайн бувкIун махъ бавссуну, жанахIраву щинал бярду къахъанан, дучIину лякъинтIиссар пластикрал, синттарал (ва цамунил) поддон. Шиву авурну чIалантIиссар хьхьирил зумания бавтIсса мюрш чару (суратрай кунма). БучIиссар, мюрш чару бакъана, дачIрасса поддон ишла дувангу. Шаппайн буххайхтува, уссая марххала цIушух, ваних-таних кьатI къабуллай, полгу зия къадуллай, усру, лирккун, поддондалуву дишин бигьар.
* * *
Бичлачисса марххала чIатIуцIун къалачIлан чIатIуйх дуккира ххяххиялул аьгъушиву.
* * *
КьатIув хъинну дяркъу дуний, къатраву жунна ччикунсса гъилишиву салкьи дуван къабигьану бикIай. Къатлувух ххуйну гъилишиву дачиншиврул батареярттачIан гъанну цичIав дикIан къааьркинссар, вайннуя нанисса гъилисса гьавалул циркуляциялухун къадахчин.
* * *
Дукра дуван ишла бувсса духовкалул нуз тIиртIуну дитира, къатта биялну гъили хьунтIиссар.
* * *
Къатраву лархъсса лампочкардая, чани бакъассагу, гъилишивугу наниссар. Лавхъун битира къатраву чани, дакIгу чанна дуван, чурхгу гъили лаган буван.
* * *
Къатлувун марцIсса гьава бачин, ванищала архIал къаттагу къабякъин, чIавахьулу дахьвасса тIитIлан бикIару жува. Щаллусса кьини ягу хьхьувай ххярацлу хьуну тIивтIуну кьабивтсса чIавахьулттивух, кIуллагу дакъа, чIярусса гъилишиву лаглагиссар. Къатлувусса гьава марцI булувара чIун-чIумуй, амма ца-кIира минутIрайсса чIавахьулу щалва ябивхьуну.
* * *
Лахъисса дяркъусса кIинтнил хьхьурдай лахъияра камин, му бакъахьурча, зузи бувара биокамин ягу фальшкамин. Вай ласунсса сант дакъахьурчагу, мюхчанну, муххал ланжарттуй бурив, ссай бурив, бивхьуну, лахъира личIи-личIисса пурмардал майлул чирахъру ва щябикIияра, вайннул чаннал пар-парлил хIисав ласлай. Уку-укунсса затру жулва инсантуран мюрщи оьрчIал тIуркIурду кунна чIалангу бюхъай, амма вайннулгур жулла цIуллу-сагъшиву дуруччавриву, дакIнил макьу дакьин давриву къачIивисса кIантту бугьлагьисса.
