Ноябрь зурул 24-нний Каспийскаллал Централ библиотекалий хьунни Дагъусттаннал халкьуннал шаэр Фазу Аьлиевал юбилейран хас дурсса, Ниттил кьини хIисаврайсса мероприятие.
Ванил сиптачиталгу бия «Аьрасатнал ниттихъул» тIисса Аьрасатнал дастталугърал республикалиймур ккуран ва Фазу Аьлиевал цIанийсса библиотекарттал система (ЦБС). Ваний гьуртту хьуна кIицI ларгсса ккурандалул хъунмур Таиса МахIаммадова, Каспийск шагьрулул администрациялул хъунаманал маслихIатчи Казбек Демиров, Исламрал бизнесрал дунияллул халкьуннал дянивсса ассоциациялул президентнал маслихIатчи Аьбдулла МуташхIажиев ва цаймигу бусравсса инсантал.
Шагьрулул школарттал дуклаки оьрчIал ва «Селебрити» тIисса Арт-агентствалул тарбиячитурал дурккуна Фазу Аьлиевал оьрус ва яру мазурдийсса назмурду. КIилчинмур школалул дуклаки оьрчIал поэтессал произведениялийн бувсса театрданул постановка хIадур дурну дия. Концертрал программа авадан дурна Федерал службалул дазурду ядувултрал управлениялул балайрдал ва къавтIавурттал ансамбльданул солистурал Ангелина ва Низами Аьбдурашидовхъал. ЦБС-лул директор, Каспийск шагьрулул мажлисрал депутат Мадина Темировал барчаллагь увкуна мероприятие лахъсса даражалий тIайла дуккан кумаг бувсса шагьрулул администрациялухь, Аьбдулла МуташхIажиевлухь ва Халкьуннал мажлисрал депутат Заур Расуловлухь. Барча бавурттал хъирив бахшишру дуллуна мероприятиялийн оьвкусса ниттихъан. Хъамаллуравух бия Аьрасатнал Виричу НурмахIаммадлул нину Сапижат Мазаевагу.
