Пишалул байрандалул гьантрай АьФ-лул виваллил иширттал министр полициялул генерал Владимир Колокольцевлул шадлугърал даражалий дуллунни ПаччахIлугърал ва ведомствалул наградартту инсантал ххассал буллай къучагъшиву ккаккан дурсса 30 полициялул зузалан. Полициялул зузалтран къучагъшиву ккаккан дан багьну бур цIараву, гьалаксса неххардий, щинал ялтту бавкьусса микIирай. Цала оьрмулунсса нигьачIаврих къабурувгун, ххассал бувну бур вайннал инсантурал оьрмурду.

– Къуллугъ буллан айивхьуну цалчинсса кьинилия шийнай полициялул зузала хIадурну икIан аьркинссар захIматсса тагьарданувун агьсса инсаннан кумаг бан. Ца-кIира секундрахьгу хъунмасса бияла буссар инсаннал оьрму ххассал бан. Зу ккаккан бунни зула пишакаршиврул даража, бюхъу-хъит, къучагъшиву. ХIакьину цал ттигу жущава бусан бюхълай бур щалагу билаятрал агьулданухь цала къуллугърал бурж лайкьну бартбигьлагьисса полициялул зузалтрая. Укунми жучIава чансса бакъар. Нанисса шинал 480 зузала лайкь хьуну ур ПаччахIлугърал наградарттан, 10 азарунния ливчу­сса – ведомствалул наградарттан. Жагьилсса пишакартурал эбрат ласунми жучIава чIявусса бур, – увкунни Владимир Колокольцевлул.
Наградартту ларсминнал барчаллагь увкунни министр­нахь цала даврин лавайсса кьимат бищаврихлу. Наградартту ларсминнавух ур Да­гъусттаннал МВД-лул «Гром» тIисса ОСН-лул хъунама оперуполномоченный полициялул лейтенант МахIаммадхан ХIажимахIаммадовгу. Ванал ххассал увну ур зунттал неххал лавсун нанисса 5 турист. Гьалаксса неххал туристътал бу­сса рафтрачIан иян къаивтукун, МахIаммадхан машиналий хьунин увккун ур. Неххавун ххявххун, ванал рафт зуманив кIурадаен дурну дур.
Мероприятиялул ахирданий Владимир Колокольцевлул барчаллагь увкунни зузалтрахь.
Р.S. «За спасение погибавших» паччахIлугърал наградартту лайкь дурну дур виваллил иширттал органнал 10 зузалал, «За смелость во имя спасения» Аьрасатнал МВД-лул медаль ларсун дур 17 зузалал, «За доблесть в службе» Аьрасатнал МВД-лул медаль – 3 зузалал.