МахIачкъалалив вай гьантрай най дуссия Дунияллул халкьуннал дянивсса музыкалул «Аьламрал чIурдал Аьрасат» тIисса цIанилусса фестиваль. Оьруснал театрданул хъунмур залдануву хьунни ва фестивальданул гала-концерт.
Фестивальданул гьурттучитурал хьхьичI лахълахъисса мукъуву ДР-лул культуралул министр Зарема Буттаевал барчаллагь увкунни проектрал автор, фестивальданул художествалул каялувчи, П.И. Чайковскийл цIанийсса Москавуллал паччахIлугърал консерваториялул «Дунияллул музыкалул культурарду» тIисса элмийсса ва творчествалул центрданул элмийсса каялувчи Маргарита Каратыгинахь.
Фестивальданул лагрулий хьусса «Буси билаятрайсса вила чIаххуврая винма кIулмур» цIанилусса конкурсрай ххув хьуминнан бахшишру дуллалисса шадлугъ тIиртIуна Маргарита Ивановнал. Ва конкурсрай 1-мур кIану бувгьуна Москавлиясса Наталия Носковал, 2-мур – Самаралиясса Наида Имаевал, 3-мур – МахIачкъалалиясса Шамил Шарипаьлиевлул.
Гала-концертрай сахIналийн бувккуна эскимосуллал «Атасикун» (Чукотка) ансамбльданул, «Аялга» (Бурятия) ва «Тыва Кызы» (Республика Тыва) ансамбльлал, халкьуннал музыкалул «Таволга» (Самараллал область) ансамбльданул, Москавуллал паччахIлугърал консерваториялул фольклорданул ансамбльданул артистътал.
Жулла республикалул чулуха сахIналийн бувккуна Т. Мурадовлул цIанийсса паччахIлугърал филармониялуцIунсса халкьуннал музыкалул «Макъам» тIисса ансамбль, ЦIуссалакрал райондалиясса «Дараччи» фольклорданул ансамбль ва ЧIарадиял арамтурал паччахIлугърал хор «Балай тIисса ЧIаради».
