Дагъусттаннал Национал политикалул ва диндалул иширттал министерствалий хьунни Каспийскалийсса «Единая Россия» партиялул секретарь, Каспийск шагьрулул Депутатътурал мажлисрал председатель АьвдулвахIид Жаватовлущалсса ва Хабаровскаллал крайрайсса Дагъусттаннал вакил Байдуллагь Исяевлущалсса пресс-конференция. Вай, жула аьралитуран гуманитар кумаггу биян бувну, зана хьуну бур Луганскаллал областьрайсса Лисичанск тIисса шагьрулия. Хьунабакьаврий гьуртту хьунни Дагъусттаннал политикалул ва диндалул иширттал министр Энрик Муслимовгу.

Пресс-конференция тIитIлай, ванал бувсунни жула республикалий чялишну най душиву Украиннаву хасъсса операциялуву гьуртту хъанахъисса жула аьралитуран гуманитар кумаг баврил даву. Бувсунни дагъус­ттанлувтал къучагъну бартбигьлай бушиву цала аьралий бурж. КIицI лавгунни та операциялуву ккаккан дурсса чувшиврухлу Аьрасатнал Виричунал цIа ларсъсса шамагу дагъус­ттанчу. Хъирив ихтилат бувсса АьвдулвахIид Жаватовлул бувсунни Лисичанск шагьрулийн­сса аьрххилул мурадрая, Донбассуллал халкьуннан бувсса кумаграя.
– Жу лавгру Донбассуллал агьалинан ва жула аьралитуран аьркинмур – квадрокоптердая, телевизордая, дизельданул генератордая, рациярдая тIайла хьуну, дука-хIачIанмунийн, гъилисса янналийн бияннин диян дан. Хъунмасса барчаллагь тIий ура Дагъусттаннал БакIчи Сергей Меликовлухь ттухьхьунна укун­сса аьрххилий гьан ихтияр дуллуну тIий. ЦIунилгу гьансса пикри буссар, – бувсунни АьвдулвахIид Жаватовлул.
Байдуллагь Исяевлул ва кIилчинсса аьрххи хьуну бур Луганскаллал халкьуннал республикалийн. Ванал бувсунни цалчинсса аьрххилий ДР-лул Миллатрал политикалул министерствалул чулухасса наградартту дуллушиву цалла Луганскаллал халкьуннал ххюя аьраличунан.
– Жула буржри цIанасса бигьа дакъасса тагьарданий хьхьичI ххуттай бавцIусса жула ватанлувтуран кумаг баву. КIицI лаган, жула аьралитал гьарица аьркинмунил дузалну буссар. Жу лавсун бувкIмургу аьралитуран дучIи лякъинтIиссар, – увкунни ванал. Ванал мукунма бувсунни кIанттул агьалинал цивппа ххарину хьунабавкьушиву, тай цивппа тархъан баврихлу барчаллагь тIий бушиву.
Энрик Муслимовлул бувсунни уттигъанну Дагъусттаннал БакIчи Сергей Меликовлул Оператив штабрал даврил лагрулий мобилизовать бувминнал кулпатирттан кумаг баврил масъала гьаз бувшиву. Ванал цинярдагу министерстварттая тIалав бувшиву мунил хIакъиравусса цала пикри бусан. Вай ххал бивгьуну махъ Да­гъусттаннал ХIукуматрал мобилизовать бувминнал кулпатирттан кумаг бансса ХIукму кьамул бантIишиву.