Октябрь зурул 15-нний ссят шамунний лакрал агьалинайн оьвтIий бур МахIачкъалаллал зума-къирагърай цIуну буллалисса РувхIанийсса центрданий дикIантIисса мавлудрайн. Ва МухIаммад Идавс (с.аь.с.) увсса рабиуль-авваль зурул савлугъран дуллалисса мавлудри.
Бусурманнан хъуннасса байранну хъанахъисса, Идавсиха (с.аь.с.) эбадат дуллай, дуаьрдай, мюнпатранну гьан буван аьркинсса зуруй лакрал агьали цачIун батIавривугу ххуйшиву дикIанссар. Мавлудрай гьуртту хьунтIиссар республикалул хIукуматрал вакилтал, депутатътал, жяматийсса ишккаккулт ва аьлимтал-динчитал. Мавлудрал хъунмур хъар лакрал районнал имамтурайн дагьлай душиврия, диялсса давуртту дуван багьлай бушиврия бия ихтилат октябрь зурул мукьунний РувхIаний центрданийн бавтIсса оргкомитетрал заседаниялий.
– Ва цIанасса шин жунна къабигьасса шин дия, бур учинсса жулва инсантал лавгунни дунияллия.
Жущава ми чIявуми махъва-махъсса ххуллийн лайкьну тIайла буккангу къавхьунни. Мавлудрай дуаьртту дуванну, жулва язисса чиваркI ва душру дакIнийн бивчуну. Ва ялагу, аьратталсса чIунну дур. Оьрмулия щалиххан бувасса жулва жагьилтал оьрмурдацIа хъанай бур. Жува циняв цачIун бавтIун, дунияллий дакьаву хьуннав тIий дуаьртту дуванну, паракьатшиву дагьанхьуви тIисса хьул-умудрай. Бухьхьияра мавлудрайн, жувагу кувннал кув бувгьусса миллат бушивугу ккаккан бан, кувннан кувгу ккаккан, – тIий бур сакиншиндарал комитетрал член, профессор Асият Буттаева.
Кабакьиннав Аллагьу Тааьланалгу ва даву лайкьсса даражалий тIайла дуккан! Мавлудран арцуйнусса кумаг буван ччисса ухьурча, ва номерданий дакI дирссаксса арцу гьан дуван хьунтIиссар : 8 988 300 77 50 (Ххадижат ЩайхахIмадовна). Сбербанкрал картар.
