Вай гьантрай оьрмулул 80 шин там хьунни Дагъусттаннал халкьуннал артистка МахIмудлул душ Оьмарова Ларинан.

50 шинал мутталий Ларина МахIмудовнал усттарну щаллу дурну дур ччимур журалул роллу: хъянсса, макрусса, аьтIунсса, цIими хьунсса, ххира хьунсса…
АрулцIалку шиннардий В. Эфендиевлул бивхьусса «Зунттал душ» тIисса Расул ХIам­затовлул пьесалуву Ларинал щаллу дурну дур Супайнатлул роль, аьсатIиннал драматург Г. Хугаевлул чивчусса «Ттул щарнил нину» тIисса пьесалуву – щарнил ниттил роль. Гайра шиннардий бивхьусса В. Розовлул чивчусса «БурчIил оьрчI» («Кабанчик») тIисса пьесалуву ус­ттарну дургьуну дур Мария Банифатьевнал роль. Мукунна В. Эфендиевлул «Шагьсаланнул тIюва» тIисса спектакльдануву – Шагьсаланнул роль. Ванил хIакъираву Москавлиясса театровед Наталья Старосельскаял чивчуну бур: «Блистательная работа Ларины Омаровой». Щаллу дурну дур «Женитьба» тIисса Н.Гогольлул пьесалувасса Арина Пантелеевнал роль. ЧIярусса дур Ларинал дургьуну жула миллатрал чичултрал ва лакку мазрайн таржума бувсса пьесарттавасса роллу: «Бурцlурдил хъатIи» (К. Мазаев) – Ссихьрал театрданул директорнал роль, «Ччавугу, макьгу» (С. Кьасумов) – Маяханумлул роль, «Хъявринсса ччаву» (Б. Рамазанов) – Маймакил роль, «Доходное место» (А. Островский) – Фелисата Кукушкинал ва цайми-цаймигу ххаллилсса роллу.
Махъ ппурттуву дургьуминнуву ляличIину дакIний личIансса дур Аслан МахIаммадовлул бивхьусса Гарсиа Лоркал «Бернарда Альбал къатта» пьесалувусса Понсиял роль. Владикавказрай фестивальданий ккаккан був­сса спектакльданун лавайсса кьиматгу бивщуну, ца зумату кунма, критиктурал увкуна:
«Ларина Оьмаровал актернал даву хъанай дур спектакльданул хъуннасса ва бунияла­сса давуну, шикку чувчIав лиян дурну дакъар сипатрал тIабиаьт – я гъалгъалуву, я ишаннаву, я къуццулуву.
Ва БернардацIун бакьлай бакъар, ванил бур цила хIакьмур, чувчIав хаин хъанай бакъар цила хасиятрайн, цила героинял хасиятрайн».
Ларина Оьмаровал театрдануву дургьуну дур аьмну арулцlаллийхъайсса роллу. Амма хIакьинусса кьинигу даврихсса гъирагу, мякьгу ваниву чан хьуну бакъар.