Сентябрь зурул 5-11-нний Владикавказрай хьунни «Театральная осень» тIисса Аьрасатнал миллатирттал театрдал мукьилчинмур фестиваль.
Фестиваль хьунни Аьрасатнал Культуралул Министерствалул кабакьаврийну, «Балтийский дом» Театр-фестивальданул (Санкт-Петербург) сакиншиннарайну.
2019 шиная шийннай фестиваль шайссия Къиримнаву.
Гьашину Донбассрай нанисса хасъсса аьралий операция сававну, форум дурунни Ухссавнил АьсатIиннал хъуншагьрулий Владикавказрай.
Фестивальданул спектакллу ккаккан бунни Ухссавнил Ккавкказнаву ца яла хьхьичIавасса театрданун ккаллисса, гьашину июнь зуруй 150 шин кIицI ларгсса, Евгений Вахтанговлул цIанийсса Оьруснал академический театрданул сахIнардай.
Фестивальданул гьанусса программалувун бухлай бия Аьрасатнал классикалул ва миллатирттал ттизаманнул драматургиялул произведенияртту.
Фестивальданий гьуртту хьунни Башкортостаннаясса, Чувашиянавасса, Къалмукьнавасса, Мордовиянавасса, Марий Эл республикалиясса, Ухссавнил АьсатIиннавасса ва Дагъусттаннаясса театрду.
Дагъусттанная фестивальданий гьуртту хьунни Лакрал театр.
Вахтанговлул цIанийсса театрданул хъунмур зал бувцIусса тамашачитурал хIурматрай кьамул бунни Аьрасатнал халкьуннал артист Руслан Хакишевлул бивхьусса оьруснал классикалул ца яла хьхьичIунсса произведениялун ккаллисса Н.В. Гоголлул «Ревизор».
Хъуннасса театрал форумрал ца яла агьамсса ишну хьунни билаятрал миллатирттал республикарттал театрдал цIусса ник тарбия давриву оьруснал классикалул агьамшиврийн багьайсса «ккуркки стол». Муний ихтилатру бунни Лакрал театрданул каялувчи Бадрижат МахIаммадхIажиевал ва хъунама режиссер Аслан МахIаммадовлул.
