ХIакьинусса кьини Бабаюртуллал зоналийсса Ккуллал райондалул арулла хозяйствалий дурну дур 2054 тонна ххалал ва 80 тонна хъаланухьхьал.
Ккуллал райондалул хозяйствардал хIадур дурну дур 6000 тонна хъалтасса кормалул. Гьашину, хъу-лухччи лазундарал аваданну душиврийн бувну, ризкьилунсса кормагу чIявусса бикIан най бур.
– Му бакъассагу, гьавалул тагьар къулайну дуссаксса, агьали уттигу буссар ххулу буллайнма. КIицI лаган ччай ура, гьашинусса шинал ризкьилун кIинттулнинсса диялсса лазуни хIадур дуршиву. Ххулу бувну махъ ихтияр дулунтIиссар лухччинийн ризкьи итабакьинсса, – увкунни шяраваллил хозяйствалул управлениялул пишакар Аьлил МахIаммадовлул.
«Дагъусттаннай анаварсса бущилий хьхьичIуннай най дур шяраваллал хозяйствардацIун дархIусса давуртту. Шикку хьхьичIунсса ккаккияртту хьун даву хьхьичIра-хьхьичI хъар хъанахъиссар жула зузалтрал захIматрайну. ЦIанасса ппурттуву зунттал щархъаву шяраваллил хозяйствалуха зузисса инсантал булувкьуну бур кIинттулнин ризкьилунсса лазуни хIадур дуллай. Барчаллагьрай ура зу буллалисса захIматрахлу!», – тIий ур цала ТГ-каналданий Республикалул БакIчи Сергей Меликов.