Августрал 8-нний Дагъусттаннал БакIчи Сергей Меликовлул каялувшиврий хьунни региондалул экономика лядуккан даврил хIакъиравусса Оператив штабрал батIаву. Региондалул каялувчинал гьаз бунни ссутнил ва кIинтнил чIумуйн хIадур шаврил масъала.
«Ччуччиялул ва энергетикалул комплексрал аралуву тагьар дузал къадурну, экономика кьянкьану лядуккан дуллан къашайссар», – кунни Сергей Меликовлул.
ДР-лул ХIукуматрал Председательнал цалчинма хъиривчу Руслан Аьлиевлул бувсунни кьатIаллил иширттал тагьардануву ДР-лул экономикалул лябукку хьун баву мурадрай дуллалисса давурттал хIакъираву. Мунал тIимунийну, регионнал экономикалун кумагран Аьрасатнал ХIукуматрал итадаркьуну дур 3,6 млрд къурушру проектру бардигьиншиврул. Дагъусттаннал ларсун дур 30,6 млн къурушру.
Руслан Аьлиевлул бувсунни социал объектру бувансса аьрщарал участокру ласаврил мухIлухIин (механизм) бигьа дурну душиву, санкциярттал чIумал хъус дуккан дуллалиминнангу, поставщиктурангу кумагран дуллалисса куклушиннаяту.
Электроэнергиялул ва газрал дузал баврил объектру ссутнил ва кIинтнил чIумалнин хIадур баврил хIакъираву бувсунни «Россети Северный Кавказ» ПАО-лул гендиректорнал цалчинма хъиривчу, хъунама инженер Виктор Абаимовлул.
БатIаврий махъ лавхъунни мукунма «Газпром межрегионгаз Махачкала» ООО-лул гендиректор Ленар Мансуровлул.
ДР-лул ХIукуматрал Председательнал хъиривчу, аьрщарал ва хъус-хъиншивурттал министр Заур Эминовлул бувсунни региондалий газрал ва электричествалул сетирдал инвентаризация даврил хIакъираву.
Дагъусттаннал дуккаврил ва элмулул министр ЯхIия Бучаевлул бувсунни ятинну ливчIсса оьрчIру къатрал дузал баврил хIакъираву.
Сергей Меликовлул тIимунийну, ДР-лул БакIчиначIа сакин бантIий бур управлениялул зузалтрал луртан дузал дувансса Комиссия. Му идаралувун буххантIий бур жяматийсса идарарттал, элмийсса сообществалул ва властьрал органнал вакилтал.
Региондалул каялувчинал тапшур бунни ДР-лул ЦIуллушиву дуруччаврил, ДР-лул Дуккаврил ва элмулул министерствалийн, МахIачкъалаллал администрациялийн ца зурул мутталий хIадур буван МахIачкъалаллал лагмасса поселокру социал объектирттал дузалшиврул даражалул хIакъиравусса информация.
