Къизилюртлив хьунни Украиннавусса хасъсса операциялуву гьуртту хъанахъисса аьралитурал чул бувгьусса патриот акция.

Акция хьунни «ХьхьичI ххуттай бавцIусса оьрчIру – жула оьрчIрур» тIисса цIанилу. Шагьрулул культуралул ва дялахърулул Малах1усайновхъал ц1анийсса паркраву Аьрасатнал триколорданущал ва Ххувшаврил Ттугъращал бувкIун бия Къизилюрт шагьрулул ва Къизилюртуллал райондалул агьали, жагьилтурал жяматий­сса организациярдал члентал, диндалул вакилтал, Донецкаллал ва Луганскаллал республикардаясса лихъачалт, Украиннавусса операциялуву гьуртту хъана­хъими, авгъан дяъвилул ветерантал, шагьрулул ва райондалул администрациялул зузалт, культуралул ва СМИ-рдал вакилтал, аьралий операциялуву гьуртту хъанахъиминнал гъан-маччами администрациялул къатрал хьхьичIсса багъравун, Аьрасатнал Президент Владимир Путиннул политикалул чул бувгьушиву ва жула аьралитурал чIарав бушиву ккаккан бан. Вайннал дакIнийн бивчунни Буттал КIанттул цIанийсса Хъун дяъвилий ва Украиннаву­сса операциялуву жанну дуллуми, миннал аьпалун баян бунни минутрайсса пахъ багьаву.
«Трезвая Россия» Федерал проектрал вакил, АьФ-лул Госдумалул депутат Султан ХIамзаевлул кумагчи Абубакар Зубаировлул кIицI лавгунни Украиннаву жанну дуллалисса жула аьралитал НАТО-лул чулухасса нигьачIаврия цала Ватан ва буттал къатта мюхчан буллай бушиву.
Аьрасатнал аьралитурал къучагъшиву мудангу дакIний дикIантIиссар жула халкьуннан. ЛяличIинура бусравссар жунна Дагъусттаннал аьралитурал чувшиву. Украиннавусса аьралий операция байбивхьуну цалчин­сса гьантрайва къучагъшиврий жан дуллусса, тай иширттаву цалчин Аьрасатнал Виричунал цIа лайкь дурсса НурмахIаммад ХIажимахIаммадов жуна тачIав хъамакъаитантIиссар. Неонацизмалущалсса талатавриву жанну дуллуну дур Къизилюртлиясса шама виричунал: хъунама сержант Батыр Аьбдулмуслимовлул, хъунама сержант МахIаммад ХIамзаевлул, чIивима сержант Алик Гъазиевлул, мукунна Къизилюртуллал райондалиясса мукьуннал: МахIаммад Сотавовлул, Ися ГъазимахIаммадовлул, Адильгирей Салмановлул ва МахIаммад ГитинамахIаммадовлул. Украиннавусса операциялуву гьур­тту хъанахъиминнал цIанияту ихтилат бунни аьралитал Ибрагьимхалил ХIажиевлул ва Рамазан Джумакаевлул. Дирсса щавурдал ва аьйплу хьусса цIуллу-сагъшиврул аьралитурал дакI гъагъан дурну дакъар. Вай, иш багьарча, ттигу хьхьичI хху­ттай бацIан хIадурну бур. Интернационалистътурал чулуха ихтилат бунни Къизилюртлив­сса «Патриоты» тIисса Авгъан ва локал дяъвирдал ветерантурал советрал председатель Александр Лежненкол. Ванал бувсунни цала Советрал Донбассуллал халкьуннан гуманитар кумаг хIадур бувшиву, вай гьантрай ми посылкартту шагьрулул бакIчинал кумагчи Канболат Салавовлущал тIайла дуккантIишиву.
Украиннавусса операциялуву жан дулун кьисмат хьу­сса ца акъа акъасса цила ссил арс Алик Гъазиевлул аьралий ххуллия бувсунни Зулайхат Тахакьаевал. Ванил дакIнийн бувтунни Украиннавусса операция байбивхьусса чIумал Алик азарханалий ивкIшиву. Цахъи къулай шайхту, дуснащал, Украиннал дазугу лархъун, цала частьравун увкIшиву. Владиккавкказуллал бахьттагьалтравух ва къизгъинсса талатавурттаву гьуртту хьушиву.
– Ванал жан дуллуссар жула бучIантIимунил цIаний, жула буржри вагу, укунна жагьилсса оьрмулуву жанну дуллусса ванал аьралий дусталгу дакIний битаву, вайннал аьпа абад баву.
ХIакьмур цумурдив, пропаганда цумурдив личIи дан хьуншиврул, лахьхьияра тарих. Аьрасат тачIавгу агрессорну къабивкIссар. Жулва мурад жулла дазурду мюхчан давур, – увкунни ванил.
Ихтилатру бунни Къизилюртуллал Хъунисриннал советрал председатель МахIаммад Аьбдуллаевлул, 9-мур школалул обществознаниялул учитель Закари МахIаммадовлул ва Зубутли-Миатли шяраваллил школалул тарихрал дарсирдал учитель Асият ХIажиевал. Цинявппагу ихтилатчитурал дакI дансса махъру увкунни Украиннаву жанну дуллусса аьралитурал гъан-маччаминнахь. Жагьилминнан бувчIин бунни жула Президентнал бувсса хIукму тIайласса ва чара ба­къасса бушиву.
Мероприятиялул сиптачитал хьунни жагьилтурал жяматийсса цачIушиннарал члентал. МиннацIун бавкьунни шагьрулул ва райондалул каялувчиталгу. Мероприятиялий 2 азарунния ливчусса инсантал гьуртту хьунни.