Билаятрай политикалул тагьар захIматсса, санкцияртту баян бувсса чIумал, паччахIлугърал БакIчинал хъуннасса къулагъас­райн ларсунни жула билаятрал производство. Хъус-кьай итадакьлакьиминнан ка-кумагран хIаллихшиннарду дансса чаран ляхълай бур. Аьрасатнавун дазул кьатIатусса кьай-кьуй къаитадакьлакьисса чIумал жучIара итадакьлакьимунил кьадру-кьимат гьаз хъанай бур.

---

Махъсса 20-хъул шиннардил лажиндарай сепараторду итабакьайсса Аьрасатнал предприятиярттаву ца хьхьичIунсса кIану бугьлай бур МахIачкъалаливсса «Сепаратор» тIисса ларкьусса акционер обществалул (ЗАО «Сепаратор»). Сепараторду байсса завод хьхьичIавагу Да­гъусттаннай ца яла сий думур бикIайссия. Дуниял даххана хьуну, чIявусса заводру лавкьусса, предприятиярттал иш-тагьар яларай дагьсса чIумал ххуй­сса каялувчи бакIрайн агьавриву тIайлабацIу хьунни ва заводран. ХIакьинусса кьини ши­кку итабакьлакьисса сепараторду тIалавну бур, Аьрасатнаву ба­къассагу, Белоруссиянаву, Къазахъисттаннай, Къиргъизнаву ва цаймигу СНГ-лул билаятирттай. Вай бур, уттизаманнул цинярдагу тIалавшиннардугу дурурччуну, лавайсса даражалий бувсса аппаратру.

Ва предприятиялул хъунаманугу ур Аьхъардал шярава­сса МахIаммадлул ва Марияннул арс ХIасан ХIасанов.
Увну ур ХIасан ЦIуссалакрал райондалийсса Аьхъардал шяраву. МахIачкъалалив школагу къуртал бувну, ца шинай зийгу ивкIун, дуклан увххун ур Дагъусттаннал шяраваллил хозяйствалул институтравун. 1992-ку шинал зун айивхьуну ур МахIачкъалаливсса сепараторду байсса заводрай цехрал хъунаману.

Москавлив къуртал бувну бур Серго Орджоникидзел цIанийсса Управлениялул академия. Цаппара шиннардий Москавлив сепаратордаха зийгу ивкIун, зана хьуну ур цува ивкIсса заводрайн. 2006-ку шинал тIиртIуну дур шикку цува заллусса предприятие ЗАО «Сепаратор». Ванал каялувшиндарай чIирисса чIумул дянив ва предприятиялул цIа хъинну машгьур хьуну дур, вайннал продукция тIалавну ва сийлий дур.

ХIакьинусса кьини ва предприятиялий зий бур шанма цех: механикалул, штамповкалул ва ЧПУ (уттизаманнул числовой управлениялущалсса станок зузисса цех). Предприятиялул итабакьлай бур ссятрай 500 литралия, 15 азарда литралийн дияннинсса накI дуккан дайсса личIи-личIисса журалул сепараторду. Вайннал сепараторду ласлай бур, накI, пиво, сокру итадакьайсса хъунисса заводирттал, дикIул комбинатирттал бакъассагу, мюрщисса фермертурал хозяйствардалгу. Дагъусттаннал заводрай итабакьлакьисса сепараторду чIявусса билаятирттай тIалавну бушиву му хъунма­сса ишри. Цал ва заводрайн увксса муштари вайннал мудана­сса клиент хъанай ур.

Республикали, чIумул захI­мат­шивур­тту духIан къархьу­ну, чIявуми заводру лавкьу­сса чIумал, ва даву нирхиравунгу руртун, производство ва даражалийн лахъан дан буниялагу хъунмасса захIмат бивхьуну бур ХIасаннул. ЦIанасса ппурттуву шикку итабакьлай бур 350 азарунния 4 миллиондалийн бив­сса багьлунсса 40-нния ливчусса журалул сепараторду. Вай бур багьлул ххирасса материаллая був­сса, вихшала дишин бучIисса ва чIярусса шиннардий бияйсса сепараторду. Ялу-ялун ххуй хъанай дур продукциялул дизайн ва качество.
– Сепараторду бан чIярусса мюрщи-хъунисса деталлу аьркинссар, ва хъинну жаваблув­сса ва захIматсса давур, – тIий ур ХIасан.
ЦIусса моделлал проектругу дуллай бур шиккувасса конструктортурал. Предприятиялий 50-ннийн бивсса инсантал зий бур.

Хьунадакьлакьисса захIмат­шивуртту ци дур тIисса жул суалданун жаваб дуллай, ХIасан буслай ур хъунмур захIматшиву кадрардацIун, пишакартурацIун дархIусса душиву. ЦIана предприятиялий зий бур нукIувасса, оьрму-хIал лавгсса, опыт бусса, даву канилух дурксса лавайсса даражалул пишакартал. Вайнная ХIасан рязину ур, амма бакъар ялун нанисса жагьилсса специалистътал.

– Зун ччай бувкIсса бухьурчан, на нава гьан бавияв ми хасъсса кIулшивуртту ласун, пиша лахьхьин Москавлив, Ростоврайн. Масалдаран, на ласав предприятиялун 14 миллиондалунсса числовой управлениялущалсса ттизаманнул станок. Авара хьура муний зунсса пишакар акъа. Нава багьагу буллуну, Ростоврайн дуккин гьан ував ваний зунсса инсан, – буслай ур ХIасан.
– Винма ва заводрай зун­сса гъира цукун багьуна? – куну цIувххукун, ХIасан тIий ур:
– Школа къуртал бувсса шинал на лавгссияв зун «Металлист» заводрайн. Таний МахIачкъалалив, Дахадаевлул цIанийсса кучалий, буссия муххая кьай-кьуй дувайсса завод, ва чIявуссаннан дакIний бикIантIиссар. Ттунмавагу хавар бакъана заводрал даврихух лавгун ияв. Ца шинава Сепараторду бувай заводрайн увкIун, хъунаманахь тавакъю бувссия ца станок була ттухьхьун арендалий куну, станок циванни, щала цех ласи увкуна танал. Укун байбивхьуссар ттул ва заводрай­сса захIматрал ххуллу, 280 инсан усса цехрай каялувшиву дуллай уссияв.
Мунияр шихуннай предприятиялул къатригу, оборудованиягу цIу дуккан дурну зий, ларайсса качествалул продукция итадакьлай, щалагу билаятрай­сса хьхьичIунсса предприятияр­ттал сияхIрай дур ХIасаннулмур предприятиягу.

Уттинин вай гьуртту хьуну бур дунияллул халкьуннал дянивсса цимирагу выставкалий. Гужсса конкуренция дусса, Аьрасатнал ва чил билаятирттал ишбажаранчитал гьуртту хъанахъисса выставкарттайгу вайннал продукциялухсса къулагъас ххишаласса дур.
Гьашину, январь зуруй, вай гьуртту хьунни Москавлив хьу­сса Дунияллул халкьуннал дянивсса Dairy tech тIисса накI-нис дуккайсса оборудованиялул выставкалий. Ваний гьуртту хьунни Аьрасатнавасса ва дунияллул 16 билаятраясса 190-нния лирчусса компанияртту. Вайннал ккаккан дунни накI-нисирал отраслилул оборудование, продукт ва ингредиентру. Вай выставкарттай вайннал цимивагу диплом лайкь бувну бур.

ХIасил, ХIасаннул компания хIакьину дунияллул даражалий иш нанисса, махъ нанисса компаниялун ккаллину дур.
Заводрал бюхъу-даража кIул хьуну, вайннащал хIала-гьур­ттуну зунсса мурадрай був­­кIун бур личIи-личIисса па­ччахI­лугъирттаясса муштаритал.
Укун цалла даву ххирасса ва ххуйну кIулсса хъунаманал биялалийсса предприятиялул цIа-кьини вания тихуннайгу хъиннура бюхттул хъананшиврий щак бакъар.

Ихтилат бувссар
Имара Саидовал
ва Андриана Аьбдуллаевал