«Дагестан» ГТРК-лул коррреспондентнал Дагъусттаннал Конституциялуву дувантIисса дахханашивурттал хIакъиравусса суалданухьхьун жаваб дуллай, Халкьуннал Мажлисрал законналсса, паччахIлугърал строительствалулсса, КIанттул цилакаялувширулсса ва регламентралсса буллалисса комитетрал хъунама Артур Исрапиловлул бувсунни Халкьуннал Мажлисрал уттисса сессиялий ххал дигьинтIисса вай дахханашивуртту хаварбакъулийсса дакъашиву, 2022-ку шинал дуван аьркинсса давурттал пландалий ккаккан дусса даву душиву. Бувсунни ва федерал закон душиву (414 ФЗ «О высших принципах организации публичной власти в субъектах РФ») ва зувинниха ливчусса субъектирттал вай дахханашивуртту ххал диргьушиву ва цIакь дуршиву, щалвагу билаятрай вай дахханашивурттал хIакъиравусса пикрирду буслай, зий бушиву. Бувсунни Да­гъусттаннал Конституциялува «территориальная целостность» дукьан дуван най бур тIисса СМИ-рдайсса ва социал сетирдайсса аваза нахIакьдансса бушиву, дахханашиннардал проект Халкьуннал Мажлисрал сайтрай душиву ва ми агьалинащал маслихIат ккав­ккуну, хъинну хъирив лавну ххал дигьинтIишиву. Ванал бувчIин бунни Аьрасатнал паччахIлугърал дазурду, мукунна субъектирдалми дазурдугу Аьрасатнал Федерациялул цIакь дувайшиву ва дазурдал хIакъиравусса хаварду гьану бакъасса бушиву. Ва ялагу, Аьрасатнал Конституциялул 67-мур статьялуву тIисса куццуй, субъектирттал территориярдал дазурду даххана дуван бучIиссар так кIивайвагу рязийну. – Законопроект тIайла дуркссар Жяматийсса палаталувун, Дагъусттаннал ПрокурорначIан, циняв жаваблувсса идарарттайн. Ва документ чара бакъа ххал бигьинтIиссар аьлимтуращал, жяматийсса ишккаккултращал, экспертътуращал, гьарца статья мюрш бивкIун, ххалуйх лахлай ххал бигьинтIиссар, – увкунни Артур Исрапиловлул.