Итникьини, июнь зурул 28-нний, Дусшиврул къатлуву хьунни Дагъусттаннал БакIчиначIасса Граждан обществалул ва инсаннал ихтиярдал масъаларттаха зузисса советрал заседание. Ва хас дурну дия Украиннай, Донецкаллал ва Луганскаллал республикардай нанисса хасъсса аьрали операциялуву гьуртту хъанахъиминнал кулпатирттан ка-кумаг баврил масъаларттан.

Заседаниялул даву дачин дурну ия ДР-лул ПаччахIлугърал секретарь МахIаммад-Султан МахIаммадов. Хасъсса операциялуву гьуртту хъанахъисса аьралитурал ва миннал кулпатирттан ихтиярду дуруччинсса чаран лякъаврия ихтилат бунни Советрал председатель Зикрулла Ильясовлул.
Заседаниялул лагрулий ххал бивгьунни Украиннавусса операциялуву гьуртту хъанахъисса дагъусттанлувтурал кулпатирттан кумаг баврил, миннансса куклушиннардал масъалартту. КIицI лавгунни ва чулухуннай чирилул организациярдал дуллалисса давуртту.
Хъинчулий ккавккунни Интернационалистътурал паркраву Украиннавусса операциялуву жанну дуллуминнал суратирттащалсса стела тIитIинсса Дагъус­ттаннал БакIчи Сергей Меликовлул пикри. КIицI лавгунни Да­гъусттаннал ЗахIматрал ва социал иширттал министерствалучIа сакин бувсса «Все вместе» тIисса фондрал давуртту.

Зикрула Ильясов, Советрал председатель

Февраль зурул 24-нния байбивхьуну хIакьинусса кьининийн най бур Украиннаву Аьрасат­нал аьралуннал буллалисса хасъсса аьрали операция.
Операциялул мурад бур Укра­и­нналгу, Аьрасатналгу агьлу националист режимрая мурахас баву, мукунна 8 шинай Украиннал аьралуннал азурда буллалисса Донбассуллал халкьуннан кумаг баву.
Ва операциялуву жанну дулун кьисмат хьунни жула да­гъусттанлувтурангу.
ЧIявусса дагъусттанлувтал, оьрмулуцIа хьумигу, къавхьумигу лайкь хьунни паччахIлугърал личIи-личIисса наградарттан. Аьрасатнал Виричунал цIа дуллунни къучагънал кунна жан дуллусса НурмахIаммад ХIажимахIаммадовлун. Къучагъшиврул орденну лайкь дунни подполковник Дибир Дибировлул, капитан Ухумали ХIусайновлул, хъунама лейтенант Джават Мамутовлул ва чIявусса цаймигу дагъусттанлувтурал. Къуллугърал бурж бартбигьлай жанну дуллусса аьралитурал, та операциялуву гьуртту хъанахъиминнал кулпатру республикалул властьрал аякьалийн лавсун буссар. Вай кулпатирттан кумаг баву мурадрай, Дагъусттаннал ЗахIматрал министерствалучIа тIивтIуну буссар «Все вместе» цIанилусса фонд. Ва фондрайн цалчин­сса арцу – 50 миллион бивчу­ссар ДР-лул. ХIукуматрал чулуха бувсса кумаграл ялун ши­чча гьарица жандалуцIа хьу­сса аьраличунал кулпатран буллуссар ца-ца миллион арцул. Ва бакъассагу, ЗахIматрал ва социал иширттал министерствалул мониторинграйн бувну кIул хъанай бур цамур журалулгу, масала, дуккин, даврийн бацIан, цIуллу-сагъшивруцIун, кредитирттацIун бавхIусса кумагру аьркин багьлагьисса кулпатру.
Аьралитурал кулпатирттан кумаг буллай бур оьрчIру садикирттайн бакьин, вузирттавун ва ссузирттавун дуклан бакьин. Хъунмасса иш буссар вай кулпатирттал дакI даву, жула чиваркIуннал къучагъшиву лахъа-хъун даву мурадрай дуллалисса давурттахьгу.
Дагъусттаннал БакIчи Сергей Меликовлул Ххувшаврил байрандалул гьантрай Украиннавусса аьрали операциялуву гьуртту хъанахъисса дагъус­ттанлувтуран дуллунни наградар­тту. Ванал сипталий генерал Оь. Муртузалиевлул цIанийсса Интернационалистътурал паркраву Украиннаву жанну дуллусса аьралитурал стела дан увкунни.
Вай аьралитурал оьрчIру вузирдавун бюджетрай дуккин бансса квота ккаккан дунни.
Му бакъассагу, ххал бигьлай бур вай кулпатирттан аьра­ли иширттал ветерантурал куннасса ихтиярду дулаврил масъала. Утти, Ветерантурал хIакъиравусса закондалуву Украиннавусса аьрали операциялуву жанну дуллумигу аьрали иширттал ветерантуран ккалли бувантIиссар.
Жула дагъусттанлувтал му­дангу укунсса иширттаву хьхьичIунну, цайминнан эбратну бивкIссар. Операция байбивхьусса чIумалва тай иширттаву гьурттушинна дан хIадурну буру тIий Президентнайн був­ккунни Дагъусттаннал УФСИН-лул, Ростовуллал областьрал ФСИН-лул хъунаману ивкIсса Муслим Даххаев, Аьрасатнал Виричу НурмахIаммад ХIажимахIаммадовлул ппу Энгельс. Дагъусттаннай чIявусса бувккунни цала чулуха аьралитуран, вайннал кулпатирттан личIи-личIисса журалул кумагру буллалисса инсантал. Шамильский райондалиясса МахIаммад Пашаев хъунмасса хIаллай вай цала кафелуву уква кьамул буллай ия.
Украиннавусса аьрали операциялуву жанну дуллусса дагъус­ттанлувтурал Аьпалул лу итабакьинсса сипталущал бувккунни МахIачкъала шагьрулул «Возрождение» тIисса школалул коллектив. Аьралитурал кулпатирттан ка-кумаг буллалисса давриву чялишсса гьурттушинна дунни жул Советралгу. «Волонтеры Победы» тIисса Щалагу Аьрасатнал жяматийсса суккушиндарал региондалул отделениялул оьвкуну, Донецкаллал республикалиясса 20 оьрчI бигьалаглай буссия жучIава хьхьирил зуманив, цIана буссар Луганскаллал республикалиясса 50 оьрчI.
Ххуйну хьунссия Советраву­сса гьарица инсаннал ца кьини­сса цала харж аьралитурал кулпатирттан кумаг буллалисса «Все вместе» фондравун бичирча ва цаймигу захIматрал коллективирттайн, жяматий­сса идарарттайн мукунсса оьвчаву дарча.

Фикрет Карибов, Совет­рал член

Украиннаву нанисса хасъсса аьрали операциялуву жанну дуллусса аьралитурал кулпатирттан ва щавурду дирсса аьралитуран кумаг баву мурадрай, цукунсса давурттив дуллай бурив районнал ва шагьрурдал хъуними кIул бан на ивра цаппара Кьиблалул Дагъусттаннал районнайн. Республикалул муниципал органнал хIукму бунни «Все вместе» фондравун районнайсса ва шагьрурдайсса зузалтрал ца кьинисса харж бичин. Цинярдагу районнай ва шагьрурдай бувну бур ливтIусса ва щавурду дирсса аьралитурал кулпатру кIул бансса ва сияхIрайн ласунсса комиссияртту. Комиссиялул члентурал ххал дуллай бур миннал ичIаллил тагьар. КIул буллай бур циксса ва ци оьрмулувусса оьрчIру бурив, цуманан ци кумаг аьркинну бурив. Дарурттал дузал баву мурадрай цIакь буллай бур ми цивппа ялапар хъанахъисса кIанттурдайсса аптекардацIун.
ЛивтIусса аьралитурал кулпатирттан аьркин багьлай бур психологнал чулухассагу кумаг. Ва журалул кумаг банссагу чаран ляхълай бур.
ЧIявуми шагьрурдай ва шяраваллаву Украиннаву жанну дуллуминнал аьпа абад баву мурадрайсса давуртту дан хIукму бувну бур.
Вирттаврал цIарду дизлай бур вай дуклай бивкIсса школардан. Аьралитал ялапар хъанай бивкIсса кIанттурдай дацIан дуллай бур миннал аьпа абад буллалисса ула. ЛивтIуминнал ва щавурду дирминнал кулпатирттан кумаг бан районнай тIивтIуну бур чирилул фондру. Масала, Сулайман Стальскийл райондалий сакин був­сса «Умуд» тIисса чирилул фондрал ливтIусса аьралитурал кулпатирттан 100 азарда, щавурду дирминнан – 50 азарда къуруш арцул дуллуну дур.

---

«Волонтеры Победы» тIисса Щалагу
Аьрасатнал жямати­йсса суккушиндарал региондалул отделениялул оьвкуну, Донецкаллал республикалиясса 20 оьрчI бигьалаглай буссия жучIава хьхьирил зуманив, цIана бу­ссар Луганскаллал респуб­ликалиясса
50 оьрчI.

---

Цинявппагу шагьрурдай ва районнай ливтIусса аьралитурал кулпатирттацIун цIакь бувну бур аьркинсса документру батIан, хIадур бан кумаг бансса социал зузалт.
ЛивтIусса ва щавурду дирсса аьралитурал гъан-маччами кьамул бан шагьрурдал ва районнал администрациярдал кка­ккан дурну дур личIисса кьинирду. Кумаг буллай бур вай давур­ттал дузал бан, аьркин дагьлагьиминнан дуллай бур къатри дансса аьрщи. Аьралитурал оьрчIан кумаг буллай бур психологтал, волонтертал.
Дуллай бур 9 ва 11 классирттаву дуклакисса оьрчIал сияхIру, ми вузирдавун ва ссузирттавун бухан кумаг баншиврул. Мюрщими оьрчIан гъинтнил лагерьдайн украсса путевкартту дуллай бур.

Сефрижат МахIаммад­расулова, Советрал жаваблувсса секретарь

МахIачкъалаливсса «Аьрасатнал нинухъру» тIисса Щалагу Аьрасатнал жяматийсса су­ккушиннардал ва Дагъусттаннал Ниттихъал Советрал Украиннавусса хасъсса аьрали операция байбишайхтува дахIаву дуссар ва операциялуву гьуртту хъанахъисса аьралитурал нитти­хъащал, кулпатирттащал, гъан-маччанащал. Вайннал буру­ккинтту чансса бакъар. Яла-яла вай ццаххандаравун багьлай бур оьрчIая хъунмасса хIаллай хавар бакъахьурча, оьвтIий ба­къахьурча.
Жу шаймур буллай буру гьарица чулуха вай кулпатирттан кумаг бан. КIул дуллай буру ичIаллил шартIру.
ХIарачат барду АьФ-лул Обороналул управлениялул Национал Центрданул горячая линиялийн бувккун аьралитурая тIайламур кIул бан. Оьрмулул хъуниминнан психологтурал чулухасса, мюрщиминнан – медициналул ва психологнал чулуха­сса уквасса кумагру буллай бур.
Жул телефондалийн гьарица кьини цала-цала буруккинттащал оьвтIисса чан къашай. Жу миннан жущава шайсса кумагру буллай бур.
Цинявппагу заседаниялий гьаз бувсса масъалартту хIисавравун лавсун, Советрал хIадур дунни министерстварттан ва ведомстварттансса, районнал ва шагьрурдал бакIчитурансса, мукунна жяматийсса организациярдансса ва Дагъусттаннал вузирдансса цаппара рекомендацияртту.