ДР-лул ва Аьрасатнал Элмурдал академиялул дянив кьутIи чирчунни хъунмасса хIаллай ва мюнпатну хIала-гьурттуну зун. Документрай къулбасру дунни Дагъусттаннал БакIчи Сергей Меликовлул ва РАН-далул президент Александр Сергеевлул Петербургуллал Дунияллул халкьуннал дянивсса Экономикалул форумрай.
Къулбасру дурминнал мурад бур Аьрасатнаву дузал дуван ва бартдигьин инновациялул политика, му дархIуну дикIаву элмугу, дуккавугу, бюхттулсса технологиярттугу лядуккан даврицIун.
Сергей Меликовлул тIимунийну, Дагъусттан чIярусса шиннардил мутталий зий бур РАН-далущал уртакьну ва хIакьину бартдигьлагьисса проектру дузал дурну дур элмулийн чул бивщуну.
– Жу Сергей Аьлимовичлущал ххал бигьарду балжисса масъалартту, жу миннуйну щаллу данну цIана чирчусса кьутIи.
Ттул пикрилий, яла гъансса чIумал жу байбишинну ми масъалартту дузал буллай, – кунни Александр Сергеевлул. Мунал бувсунни мукунма цуми арардаву зунтIий буссарив уртакьну, цукунсса захIматшивуртту духлаган дуван кумаг буллантIиссарив.
