![](https://ilchi.info/wp-content/uploads/2022/06/cfkghkgvkv-e1655462334526.jpg)
Гьашину 110 шин хъанай дур ЧIяйннал шяраву школа тIивтIуния шиннай. Нагу дуклай уссияв ва школалий 1951-1953-ку шиннардий. Ва школалул ттул дакIниву кьадиртссар ликъаххайсса чаннасса аьшру. Оьрмулул 86 шин хьусса хъуначу унугу, ттун, лахьхьу-цархьхьу хьусса кунма, дакIний ливчIунни школалуцIун бавхIусса ишру.
1951-ку шинал, жу, Хъусращиял шяраву 7 класс къуртал бувсса 8 оьрчI лавгссияв 8-мур классравун дуклан ЧIяйннал школалийн. Райондалий гай шиннардий цамур шяраву дянивмур даражалул кIулшиву дулайсса школагу бакъая. Га шинал ттул хъунама уссил, Камалуттиннул, къуртал бувну бивкIссар ЧIяйннал школа. Жу кьамул бувунав школалучIасса интернатрайнгу. Интернатрал зузалтрал ттул чулухуннайсса ябитаву дикIайва хIурматрайсса, «Камалуттиннул уссу» учайва ттуйнмагу. Ттул хъунама уссу, балайчи, мандолина бищу, марцIсса ххювардай дуклай ивкIсса оьрчI, бусраврай ивкIун ия учительтурал, интернатрал зузалтрал, шяраваллил жяматрал дянив. Интернатрал дукра дувуну бикIайва Бича тIисса, гьайбатрава нур нанисса, хъамитайпа. Ганил ттул чулухуннайсса аякьа дикIайва цила лякьлул оьрчIаха куннасса. ХIасил, на ганил ккашил хьун тачIав къаитайвав.
Ттул дакIниву чаннасса аьшру кьадиртссар ттухьра дарсру дихьлай бивкIсса учительтурал.
Ттун тачIав хъамакъабитай, ЧIяйннал школалийн дуклан нанисса чIумал, ттула хъунама уссил ттухьва, дюъ дихьлай увкусса махъру: «Ургу, уссай, ина чил шяравунна нанисса. Утти вил оьрчIшиву къурталссар. Вил къуццу тIаву дикIан аьркинссар бакI магъулун щусса инсаннал куннасса», – куна.
Хъунама уссил дирхьусса дюълил дарс гьанулун ларсун гьан дурссар на ЧIяйннал школалий дуклакисса шаннагу шин. Гай 3 шинал мутталий цучIав къавхьуссар ЧIяйннал шяраву ттун я мукъуйну, я тIулуйну къаччан бикIан бувсса. ДакIнийхтуну барчаллагьрай уссара шяраваллил жяматрайн, ттула оьрмулуву ххуй чулийнмайсса асарду хIасул хьунсса кIану бувгьуну тIий. Ттул дакIниву хIакьинусса кьинигу лещан бувар ттухьра дарсру дихьлай бивкIсса учительтурал чулинмайсса хIурматрал лама. Вайнная цучIав цIана сагъну ливчIун акъар. Цал рухIру алжаннуву паракьат хьуннав, цал бунагьирттал аьпа баннав!
Ттул дакIниву чаннасса аьшру кьадиртссар ттухьра дарсру дихьлай бивкIсса циняв учительтурал. Цинявннал цIарду кIицI къадуварчагу, цаппарассанналсса зумух ласун ччива: Сулайманов Багьауттин – Ккулатусса, Аьбдуллаев ХIабибуллагь, Гьарунов Анвар – СунбатIлиятусса, ХIусайнаев Абачара – Хъусращатусса, Амиров Апанни, Айдаев Аьли, Мяммакьурбанов Сулайман, Каримов МахIаммад – ЧIятусса, Оьмариев МахIаммад – 1-мур ЦIувкIратусса, Тавитов Тазрет – АьсатIиннавасса.
1951-ку шинал ттущал 8-мур классравун дуклан бувкIун бивкIсса Хъусращиял, Ккуллал шяраваллал оьрчI-душваврава чIявуми ахиратрал ххуллийх лавгун бур. КIицI лаганна цаппарассаннал цIа-бакI: Хъусращатусса АхIмадов Сулайман – филологиялул элмурдал доктор, Нураттинова Жамилат – РСФСР-данул цIанин лайкь хьусса учитель, Гаргацев Гьарун – хIисаврттал учитель, Султанов Киров – философиялул элмурдал кандидат, Зуллуев Аьлил — астрономиялул элмурдал кандидат, Мусиев ЯхIия – хIакин ва мукунма цаймигу.
На къуртал бувссия 1958-ку шинал Дагъусттаннал шяраваллил хозяйствалул институтрал агрономтал хIадур бувайсса факультет. Зувира шин дурссар нава язи бувгьусса пишалий личIи-личIисса къуллугъирттай зий.
Бадави Рамазановлул цIанийсса ЧIяйннал школа Ккуллал райондалул школарттал дянив хIакьинугу хьхьичI ххуттай бур.
Чанкура КьурбанмахIаммадов