Дуккаврил шин, хаснура ванил дайдихьу, оьрчIан ва нитти-буттан бигьа дакъасса дикIай. Шикку жухьва, нитти-буттахь, хъунмасса бияла буссар, жувагу паракьат хьуну, оьрчIругу паракьат бан, дуккаву сававну вайннал нервардал системалунгу, аьмну щалла цIуллу-сагъшиврунгу зарал биян къабитан. ЦIусса дуккаврил шинал хьхьичIсса нигь, ццахханну чIярумур чIумал нитти-буттаятур оьрчIайнгу дияйсса.

Цалчинмур классравун цалчин нанийни
Цалчинмур классравун нани­сса оьрчI нигьа увсун, хъанахъимур къабувчIлай ухьурча, шаппа мунащал суратру дихьлахьисса, магьри ляхъан буллали­сса тIуркIурду буллали, ванийну бувчIин буллай оьрчIан школалийгу укунма бикIантIишиву. Вава журалийсса тIуркIурдайну оьрчIру, хаснува нигьа бусласи­сса, лякIлакIисса, шинал хьхьичIва хIадур булларчан хъинссар.

ЦIусса дуккаврил шинал цалчинмур нюжмар
Яла-яла захIматсса дикIай цIусса дуккаврил шинал цалчинсса нюжмар: гъинтнил каникуллай хIура бувксса оьрчIру хьхьувай чIумуй уттубишин, кIюрххил чIумуй бизан буван, дуканмунилсса, лахханмунил­сса буван, школалийн биян буван, махъунмай хьунабакьин…
ЦIусса режимрайн аьдат хъанан захIматри мюрщиминнангу, хъуниминнангу. ОьрчIру кIюрххил шания бизан булувара паракьатну. ОьрчI зул лахъсса чIуния ццаххандарай чантIа тIун къааьркинссар. ЧантI увкусса оьрчIан нитти-буттал симандалийсса пиш ккаккан аьркинссар ва ттюнгъасса чIу баян аьркинссар.
КIюрххила гьужумру буллай, аьйрду дуллай, оьрчI авара маулларди, хIатта мунай аьй хьуну духьурчангума. Ссавур дуну бикIира, гъалатI – му къачагъшиву дакъар.

Портфель архIал хIадур булувара
Цалчинсса гьантрай оьрчI школалийнсса портфель, лаххан­сса янна цува хIадур дуллан ччай акъахьурча, гужирай дуллали маулларду. Дуваймур оьрчIащал архIал дуллали, чан-чанну тIий цаллалу дуллай аьдатгу уллай.

Чан бувара оьрчIайнсса гьужумру
ЦIусса дуккаврил шинал дайдихьулий оьрчIайн гьужумру шайссаксса чанну буллали, чанну дувара дувайсса аьйгу. Хъамамабитару цIусса дуккаврил шинал дайдихьу, ванийнсса адаптация оьрчIансса дикIайкунсса стресс хъанахъишиву.

Ци-дунугу дуван къашаву кьюкьалашиву дакъар
ОьрчIан бувчIин бувара дуваймур, яланин къадиртун, най дуна дурну хъиншиву, бигьашиву, хьхьичIва-хьхьичI цанна оьрчIан. Ци-дунугу дуван къа­хъанахъисса чIумалгу чIумуй кумаграл хъирив цаманачIан бу­ккаван аьркиншиву, шикку кьюкьаласса цичIав бакъашиву, дуваймур най дуна ва багьайсса куццуй дуван цал-цал къахьунгу бюхъайшиву, мюрщиминнаща бикIу, хъуниминнаща бикIу.

ОьрчIал хьхьичI учительтураясса гъалгъарду мабулларду
ОьрчIал хьхьичI учительтураясса ихтилатру бачин мабулларду, акъарив оьрчIаву школалиясса тIайла бакъасса пикри хIасул хьун бюхъайссар. ХIурмат буну бикIи зула оьрчI дуклакисса кIанттул, цанчирча школалийн лагайхту бакIрайра, кIулшивуртту ласаврищал архIал, хъуннасса агьамшиву дуссар оьрчIан цала учительнал личностьрал ва цащала архIал дуклакиминнал.

ОьрчIангу ххуйну лаххан ччиссар
ОьрчIангу, хъуниминнан кунма, ххуйну лаххан ччиссар, цивппа авурну чIалай ччиссар. Мунияту оьрчIал школалийн лахлансса яннагу, ишла дулланмургу вайннащал архIал ларсун хъинссар. ОьрчIру цанна къаччимур гужирай лахлахи къабувну хъинссар.

Гихунмайгу буссар…
ХIадур бувссар
Бадрижамал Аьлиевал