Августрал 30-нний ЦIуссалакрал райондалул администрациялул къатраву хьунни кIулшивуртту дулаврил ххуллий зузиминнал совещание.

Шикку гьуртту хьунни ЦIу­ссалакрал райондалул бакI­­­чи МаматIи ХIамзатов, в­а­нал хъиривчув Арсен Гъазиев, ЦIуссалакрал райондалул КIулшивуртту дулаврил управлениелул хъунмур Светлана Къудаева, райондалул КIулшивуртту дулаврил зузалтрал профсоюзрал председатель АьвдулхIамид Нахаев ва райондалул кIулшивуртту дулаврил идарарттал каялувчитал.

Совещаниелул даву дайдихьлай, МаматIи ХIамзатовлул барчаллагь увкунни ялун нанисса ник тарбия давриву ва кIулшивуртту дулаврил ххуллий хъунмасса захIмат бихьлахьисса педагогтурахь. ЦIусса дуккаврил шинащал барча буллай, чIа увкунни цIуллушиву, давриву хъунисса хьхьичIуннайшивуртту.

Совещаниелул даврил лагрулий, «Муниципальное образование: новые вызовы, современные приоритеты и перспективы их реализации» тIисса агьам­сса доклад бунни Светлана Къудаевал. Ванил бувсунни ларгсса дуккаврил шинал хIасиллая ва цIусса дуккаврил шинал учительтурал хьхьичI бивхьусса агьамсса масъаларттая.

Шикку ихтилатру бунни «Развитие – Движения Первых» тIисса суккушиннарал каялувчи Жамиля Мусиевал, «Солнышко» МКДОУ-рал хъунмур Оксана Исмяиловал, Директортурал советрал координатор ПатIимат Аьбдулмуслимовал, Пионертурал ва дуклаки оьрчIал къатлул методист Магьинур ХIажиевал.
Ахирданий наградартту дуллунни давриву хьхьичIунсса хIасиллу дурсса педагогтуран.