[dropcap]В[/dropcap]ай гьантрай Дагъусттаннал паччахIлугърал политехнический университетраву хьунни хьхьичIунсса хIасиллащал вуз къуртал бувсса выпускниктуран ЯтIул дипломру буллалисса шадлугърал даражалийсса мажлис.

Ва кьини вузрал фойераву 40-хъул идаралул ва компаниялул тIиртIуну дия ххуй­сса ккаккиярттащал вуз къуртал бувсса выпускниктал давур­ттайн кьамул буллалисса вакансиярттал ярмаркагу. Выпускниктал давурттал дузал бан хIадурсса идарарттавух бия ГКУ РД ЦЗН В МО «Город Махачкала», АО «Дербентский научно-исследовательский институт «Волна», «Всероссийский студенческий корпус спасателей» тIисса Щалагу Аьрасатнал жагьилтурал жяматийсса идаралул Дагъусттаннал отделение, Москав шагьрулийсса «Прайм Медикл Сервис» ООО, «Электроснаб» ООО, «Проминженеринг» ООО, ГБУ РД «Дагтехкадастр» ва цаймигу.

ЯтIул дипломру тапшур буллалисса мажлис тIивтIуна ДГТУ-лул ректорнал бигарду чIумуйну биттур буллалисса Назим Баламирзаевлул. Ванал барчаллагь увкуна, хьхьичIунну дуклай, университетрал жяматий­сса иширттавух чялишсса гьурттушинна дуллай бивкIсса ДГТУ-рал отличниктурахь.

Выпускниктал барча буллалисса ва гихунмайсса оьрмулуву вайннан тIайлабацIу чIа тIутIисса ихтилатру бунни ДР-лул ХIукуматрал председательнал хъиривчув Муслим Телякавовлул, ДР-лул ХIукуматрал председательнал хъиривчув, ДР-лул аьрщарал ва имуществалул иширттал министр Заур Эминовлул ва ДР-лул кIулшивуртту дулаврил ва элмулул министр ЯхIия Бучаевлул.

– ХIакьину, зул оьрмулуву хъуннасса агьамшиву ду­сса кьини, хьхьичIва-хьхьичI барчаллагь учин ччай ура университетрал каялувчитурахь, кIулшивуртту дулаврил ххуллий хъунмасса захIмат бивхьусса профессортурахь, преподавательтурахь. Умуд бур зува зузисса кIанттурдай тIалавсса ва куртIсса кIулшивуртту дусса пишакартал хьунссар тIисса, – увкунни Заур Эминовлул.

ЯтIул дипломру лавсъсса выпускниктал барча бунни Муслим Телякавовлулгу.
– КIицI лаган ччай ура зун хъунмасса тIайлабацIу хьушиву – укун лавайсса даражалул преподавательтал ва насихIатчитал бакIрайн багьну. Зу исват бунни оьрмулул дайдихьулул ххуллий­сса захIматсса шачIану лайкьсса даражалий бивтшиву. ДакI дарцIуну ура вузралгу, республикалулгу цIа-кьини бюхттул дансса пишакартал зуя хьуншиврий, – увкуна ванал.

Выпускниктурахь ва педагогтурахь барчаллагь тIутIисса ихтилат бунни ЯхIия Бучаевлул.
Дагъусттаннал паччахI­лугъ­рал технический университетрал экономикалул ва управлениялул информациярттал системардал факультет ЯтIул дипломращал къуртал бунни жула лаккуоьрчIал, Хъусращиял шяравасса Русланнул арс Ренат ЯхIияевлулгу.

Ренатлул марцIсса ххювардай къуртал бувну бур МахIач­къалаллал 26-мур школа. Муния махъ дуклан увххун ур Республикалул политехнический колледжравун. Вагу ЯтIул дипломращал къуртал бувну, увххун ур ДГТУ-равун. Вузраву дуклаки­сса шиннардий ласлай ивкIун ур Республикалул Президентнал стипендия. Университетраву най диркIсса олимпиадарттай, конкурсирттай гьуртту хъанай, лайкь хьуну ур ХIурматрал грамотарттан ва арцуйнусса бахшиширттан. Утти хьхьичIунсса выпускниктурава Ренат язи увгьунни Республикалул экономикалул ва бухгалтертурал центрданийсса пишакартуравух зун.

КIицI лаганна Ренат марцIну лакку мазрайгу гъалгъа тIутIисса, шеърирду чичаврилгу гьунар бусса жагьил ушиву.
Дипломру буллали­сса мажлисрай Ренатлул барчаллагь увкуна факультетрал декан Земфира Раджабовахь – ххюра шинал лажиндарай дарсругу дихьлай, ниттил куннасса аякьагу дуллай бивкIсса, мукунма преподавательтурахь ва архIал дуклай бивкIминнахь.