Дуклаки оьрчIал 11 шинал лажиндарай бувсса захIмат вайннал лайкь бувсса марцIсса ххювардайсса аттестатирттал ва мусил медальлал тасттикь буллай бур. Гьашину мусил медальданий школа къуртал бувминнавасса ур ЧIурттащиял шяравасса Мирзал арс Амирхан МахIаммадов. Амирханнул къуртал бунни МахIачкъала шагьрулул 3-мур лицей.

---

[dropcap]Ш[/dropcap]иву дуклакисса шиннардий Амирханнул, унгу-унгуну ЕГЭ-рдайн хIадур хъанай, дарсру лахьлай, хъунмасса захIмат бивхьунни. Хаснува 9-11-ми кла­ссирттаву, лицейравусса дуккаврий гьашиву къадурну, ххишаласса кIулшивуртту ласунсса хIарачат буллай, бакI гьаз дан­сса чIун дакъа дуклай ивкIунни. ХIасил, хIарачатран – барачат. КуртIсса кIулшивуртту ласаву мурадрай цала хьхьичI бивхьу­сса хиял бартлаган бан бювхъунни жагьилнаща. Укунсса выпускниктурал хьхьичI тIитIлай дур ччимур вузравунсса нузру. Вай­ннайнни хъар хъанахъисса билаятрал бучIантIимур.

Амирхан ур дуккавривугу, спортравугу хьхьичIунсса оьрчI. Ванан хъинну ххирар личIи-личIисса луттирду ккалангу. Лицейраву ГТО хьхьичIунну дулаврихлу ва лайкь хьуну ур ДР-лул Спортрал министерствалул чулухасса мусил медальданунгу.

Амирханнул дуклан уххан язи бувгьунни цала ттатталгу къуртал бувсса М. В. Ломоносовлул цIанийсса Москавуллал паччахIлугърал университет.
«Ттул ттаттал, Магьдинал, ва вузраву 1983 шинал дурур­ччуссия кандидатнал диссертация. Ттун хъинну ххирая ттула ттаттащал МГУ къуртал бувсса, чIявусса затру кIулсса выпускниктурах вичIи дихьлан. Вайнная ттун чIявусса тамашасса затру кIул шайва. Мунияту ттунгу МГУ-равун уххансса гъира багьуна.

Лицейраву ккалай ивкIсса шиннардий лавхьхьунни ттун хьхьичI бивхьусса пикри-хияллу бартлаган буллан, иш багьсса кIанттурдай, пикригу бувну, тIайласса хIукмурду буллан. БувчIунни, ччан бикIарчан, инсаннаща дан къабюхъайсса цичIар дакъашиву. Барчаллагь тIий ура жухьра дарсру дихьлай бивкIсса цIанихсса преподавательтурахь», – тIий ур Амирхан.

КIицI лаганна Амирхан буттал кIанугу, лакку мазгу ххирасса патриотгу ушиву. Цува шагьрулий увсса, хъуна хьусса унагу, ванан хъинну ххирар буттал шяравалу, ЧIурттащиял щар. ОьрчIнийва зунттавун занай аьдат хьусса Амирханнун хIат-хIисав дакъа ххирар буттал шяравунмайсса аьрххирду, вайннал кулпат ччя-ччяни лагайссар Лаккуйн.
«Зунттурдайн я щайхту, дакI ххарисса асардал видуцIай. Ла­кку билаятраяр рахIатсса кIану цамур бакъассар. Зунттавусса ЧIурттащиял шяраву дуссар жул буттахъал къатри. Ци дуссар дунияллий жулва зунттаяр, ардаяр илкинсса. Каникуллу дучIаннин ялугьлан икIайссияв ттула бу­ттал шяравун иян. Игьалагара так зунттаву», – буслай ур Амирхан.
ЧIа учинну Амирханнун гихунмайсса оьрмулуву хъунисса тIайлабацIуртту.