Гьашину МахIачкъалаллал №39 школа мусил медальданий къуртал бунни жула ла­ккуоьрчI ХIажиев Юсуп Зураб­лул арснал.

Цалчинмур классрая шихунай Юсуп дуклай ивкIун ур лавайсса кьиматирттай. КIулшивуртту дусса, итххявхсса оьрчI гьан айсса ивкIун ур циняв дарсирдал олимпиадар­ттайн ва бугьайсса бивкIун бур хьхьичIунсса кIанттурду. Му бакъассагу, Юсуп чIивинияцIава спорт ххирасса, личIи-личIисса журардал спортрахун агьсса оьрчI ивкIун ур. Школалий дуклакисса шиннардий ва занай ивкIун ур А.Карповлул шахматирттал школалийн, каратэлул, боксрал секциярдайн.

ЛичIи-личIисса бяст- ччаллаву гьуртту хьуну, хьхьичIунсса кIанттурду бугьайсса бивкIун бур. Школалий дуклакисса шиннардий ванал лайкь дурну дур цимирагу хIурматрал грамота.
Юсуп ур мяърипат дусса, жаваблувсса, дакI хъинсса жагьил.

[dropcap]В[/dropcap]анал ппу Зураб Хьур­ттал шяравасса ур. Ва Гъумучиял РЭС-рал хъунаману ур. Нину Икрема бачIи Гъумуча, бачIи Ккурклия бур. Ва зий бур МахIачкъалалив нотариуснал кумагчину. ЧIивима уссу Хайруттин ХIажиев 9-мур классраву дуклай ур.

[dropcap]Ю[/dropcap]суплун, цала буттал буттал ппу, цIанихсса хIакин, аьлимчу, профессор ХIажиев Хайруттин Эфендиевичлул шаттирдайх ачин, медициналул вузравун уххан­сса пикри бур. Щак ба­къар, ваная цала цIанихсса агьулданул ирс лайкьну буруччинсса жагьил хьуншиврий.
Цинявппагу хияллу ва дакI­нийсса мурадру бартлаганнав. ТIайлабацIу хьуннав.

---

Гьашину Москавуллал №1164 школа мусил медаль­даний къуртал бунни жула ла­ккудушнил – КIундиннал шяравасса Исял ва Аьйшатлул душ Хъунбуттаева Маликатлул.

Москавуллал школа мусил медальданий къуртал бан хъунмасса бюхъугу, хIарачатгу аьркиншиву бувчIлачIисса зат бур. Цалчинмур классрая байбивхьуну, Маликатлул цинявппагу классру марцIсса ххювардай къуртал бувну бур. Дуклаки­сса шиннардий, оьрус мазрал, литературалул ва цаймигу дарсирдал олимпиадарттай гьуртту хьуну, грамотартту ва бахшишру ласайсса диркIун дур. ЕГЭ-гу ванил, цуя-ца репетитор къаувгьуну, цила хIарачатрай, цила кIулшивурттай дуллуну дур.

ДакIнийн бутан, цаппара шиннардил хьхьичI Маликатлуя «Илчи» кказитрай чивчуну буссия. Та чIумал ванил Москавуллал школарттал дуклаки оьрчIал дянивсса Совет Союзрал Виричув Надежда Трояннул завалунсса спартакиадалий, ттуплий буккаврил бяст-ччалливу, цалчинсса кIану бувгьуссия.

КIилчинсса кIану бувгьуссия Маликатлул цала школалий баян бувсса «Варвара – краса, длинная коса» тIисса конкурсрайгу, цила лахъисса хIаллурду кка­ккан бувну. ХIайп, утти мигу ванин кьукьин багьну бур.
Маликатлун журналистнал пиша ххуй бизлай бур.

[dropcap]В[/dropcap]аниву му чулухунмайсса гьунаргу бур. Амма журналистикалийн хъинну хъуннасса конкурс дур, льготникталгу чIявусса бур тIий, буруккинттарай бур. Ванин ххюва вузравун документру булунсса пикри бур. ЧIа учинну жула лаккудушнин тIайлабацIу. ДакIниймур бартлавгун ххари баннав.
Андриана Аьбдуллаева