Лаккуйгу ялу-ялун машгьур хъанай дунуккар мотоциклетру ссур дуллалисса спорт. На уттигъанну чивчуссия Щуну-Зунттул бакIрайн мотоциклетирттай гьаз хьусса ЦIувкIуллал жагьилтурая – Камил Маммаевлуя ва Мурадлуя. Вана уттигу ЧIурттащиял бизантту мотоциклетирттай мютIи бувсса цаймигу жагьилтал.
– Июньдалул 29-нний, ЧIурттахьхьун лавгсса ппурттуву, ттунгу, Исмяил МахIаммадовлунгу хьунаавкьунни жула шяравучу, Аьбдуразакьлул арс Къушиев Заур. Ва мотоциклетрал экстремал спортрал мастер ур. Сисаврийну ва бюхъулийну ванал жу хIайран бунну. Шяраваллил бакIуя гилун неххачIангу увчIун, ЧIарттаарнил бизанттайн гьаз хьуна, кIичча, тамур чулухух хьуну, Сунув увчIуна, ялагу цIуницIа Гьаннаралу тIисса кIанттайн гьаз хьуна.
Жу вас-ццахлий ялугьлай бивкIру цIуллуну-сагъну Заур зана хьуннин. Зунттал ххуллурдайх мотоциклет ссур дуван сисавугу, бюхъугу, усттаршивугу аьркиннихха. Ахттаяр махъ ва дуснащал НувцIаялу тIисса кIанттай цIунилгу бакIрайн гьаз хьуна, ххялларисса ххуллийх, зунттавух хьуну, КIувурдал чулийнай лавгуна. Заурдул ва ванал дуснал жун ва ххуллухьгу чувшиву, сисаву ккаккан дурна. ЧIалай бия вай ххуйну хIадур хьуну бушиву, нигь дакъа ссур дуллай бия мотоциклетру. Жугу, Заурдун укун нигьачIисса спортраву урувччуну икIан маслихIатгу бувну, тIайлабацIугу чIа куну, лавгру, – укун бувсунни жагьилтурал гьунардая профессор Шагьимардан Мудуевлул.
БакIрайва кIицI лавгсса куццуй, ва спортрал жура жагьилтурал дянив ялу-ялун машгьур хъанай бухьувкун, бучIия Лаккуй мотоциклетру ссур дуллалисса бяст-ччаллил тIуркIурдугу буван.
