[dropcap]Ч[/dropcap]Iавахьулттах гьава цалнияр цал кIири хъанай бур. Цукунни кIиришиврия буруччинтIисса? ТIабиаьтрал цилва ва кIанттулгу пикри бувну бур, гьарца инсаннаву дирхьуну терморегуляциялул механизм. Гьава кIири шайхту, жулла оьттул сосудру гьарта дуклай дур, дуклакисса гьухъ гьарза хъанай дур. Дунугу, гьарца организмалул бур кIиришиврущал лаллансса цилва-цилва гуж, цилла хасшивуртту: укун, цавайннал кIиришиву бигьану духIай, вайминнал – лап захIматну. КIиришиву духIан яла-яла захIмат хъанай бур къюкIлил ва сосудирттал, эндокринная системарттал къашайшивуртту думиннан, оьрмулул бугьараминнан, лякьлуву бусса хъаннин. Щин бухьурчангу, кIиришиву духIавриву дакIнийн бичаврил ххуллийсса цаппарасса маслихIатру къабахчинссар тIиссару.
КIиришивруща бурувччуну бикIаншиврул
Бургъия лабикIи
Бюхъавай, бургъия лабикIлакIи, вагу цирча, ца минутIрайсса буккаврилгу цичIав къахьунссарча тIий, бакIрай зат дакъа хIаятравун, чIаххуврайсса ттучандалийн кIири бургъилух къабуклай. Шикку чансса, тикку чансса тIий, кIири лаглай, бурчугу багьайссаннуяр ччуччайссар, ччяни хъунмав шайссар, бакIрангу, чурххангу зарал бияйссар, най буна ялун къачIаларчангу, ялун къаличирчангу. Бургъия зарал инсан га уний тIирх куну агьний бакъа къабивсса ххай мабикIару.
КьатIув, бюхъавай, баргъ кIири бувний бувагу мабуккари (ссят 11-нния 16 хьуннин). Букъавккун къабучIисса иш бухьурчагу, бакIрай зат дакъа ягу бургъиясса ххют дакъа, баргъ лачIаврийн къаршисса крем къадурккун мабуккари, шайссаксса ххют думи кIанттурдайх сакингу дувара зулва аьрххилул маршрут.
Янна лаххира
чаннасса
ва чурххацIун къаларчIсса
КIиришиву дусса зурдардий лахлахира, бюхъавай, чаннасса, чурххацIун къаларчIсса янна-ус, синтетика хIала дурагу дакъасса ягу чансса янналия дурсса. Гъинтнил зурдардий махъаллил хьияра оьтту щурущаврин дайшишру дуллалисса чIурусса мухIулттая, мукунна кIиришиву ва кIушиву ххи дуллалисса чIюлушиннардия, лажиндарал бурчу бащан буллалисса, ссихI буххан къабитлатисса чIяру косметикалия, кьанкь аьнтсса аьтрилия, ччанну буруххан буллалисса никъа лахъ уссая.
Диялсса щин хIачIира
Гьава кIирисса чIумал гьантлун диялсса щин (2,5 – 3 литра) хIачIаврил ялув хъиннува бацIира. КIирисса гьантрай чурххаву щинал баланс лияйссар, чIярусса хъатрулуцIа хъанай. Махъаллил хьун аьркинссар (кIиришиву дусса гьантрай бакъа, муданмагу) нацIусса ва газ бусса щиная.
МикIларчIсса щинай – къадагъа
Гьава кIирисса, хханхха бакъагу, щалвавагу чурх кIири лавгсса гьантрай хъуннасса нигьачIаву дуссар микIларчIсса, хъинну дяркъусса щиная: хIачIан хьуннав, щинавун бучIан хьуннав. Цакуну температура даххана шаврия жунма я мюнпат, я дюхлу дакъассар. ХIачIира къатлул температуралийсса щин. Щинавун бучIан ишла дувара гъилисса щин.
Кондиционер ишла дувара тарину
Ттизаманнул инсантурава чIявуминнаща кондиционер дакъа бацIан къашай. ТIайлар, кондиционерданул хIасул дувай чурххан тIааьнсса гьавалул тагьар, кIинттул дикIу, гъинттул дикIу. Амма хъамамабитару вания хъунмасса зарал биян бюхъайшивугу. КIирисса кьатIату кондиционерданул бякъин бувсса къатлувун (кабинетравун) цакуну буххаврия ва бявкъусса къатлува кIирисса кьатIув най буна буккаврия зарал буссар, ва даву мугъаятну, чан-чанну тIий дуван аьркинссар. Кондиционергу ишла дувара мугъаятну.
Ссупралий
чIяру дувара ахъулсса ва ахънилсса
КIирисса зурдардий махъаллил хьуну хъинссар хъиннура аьгъусса ва цIу бусса дукралия. ЧIяру дурну хъинссар ахъулсса ва ахънилсса. Амма хъамамабитару ва курчIил махъанарду дукралувун ишла дуллалисса ахъулсса, ахънилсса, накьлил уртту ххуйну шюшин, махъра-махъгу, крандалувасса щинай шюршуну махъ, марцIсса щаралархъсса щинай шюшин, бюхълахъисса иш буний, ялтту кIирисса щингума дутIаван. Накьлил урттурив 20-30 минутIрайсса диртун хъинссар чан-чансса цIу ва сода бивчусса щинаву.
Ахъулсса ва ахънилсса, та-духьурчангу, дикIан аьркинссар щаллусса, зия хъанан къадиркIсса, гьава кIиринийрив хаснура.
Гихунмайгу буссар